ប្រទេសកាណាដា កាលពីថ្ងៃពុធ (០៦ វិច្ឆិកា) បានបញ្ជាឱ្យរំសាយអាជីវកម្មរបស់បណ្ដាញសង្គម ទីកតុក (TikTok) ដែលគ្រប់គ្រងដោយចិន នៅក្នុងប្រទេសកាណាដា ដោយលើកឡើងពីហានិភ័យសន្តិសុខជាតិ ប៉ុន្តែបានបន្ថែមថា រដ្ឋាភិបាលមិនបានហាមប្រាមការចូលប្រើប្រាស់របស់ពលរដ្ឋកាណាដាចំពោះកម្មវិធីវីដេអូខ្លីមួយនេះ ឬសមត្ថភាពរបស់ពួកគេក្នុងការបង្កើតមាតិកានោះទេ។

លោក Francois-Philippe Champagne រដ្ឋមន្ត្រីក្រសួងច្នៃប្រឌិត បាននិយាយនៅក្នុងសេចក្តីថ្លែងការណ៍មួយថា "រដ្ឋាភិបាលកំពុងចាត់វិធានការដើម្បីដោះស្រាយហានិភ័យសន្តិសុខជាតិជាក់លាក់ទាក់ទងនឹងប្រតិបត្តិការរបស់ក្រុមហ៊ុនមេ បៃឌែនស៍ អ៊ិលធីឌី (ByteDance Ltd) ក្នុងប្រទេស តាមរយៈការិយាល័យ ទីកតុក នៅកាណាដា (TikTok Technology Canada Inc)"។

ទីក្រុងអូតាវ៉ា កាលពីឆ្នាំមុន បានចាប់ផ្តើមពិនិត្យមើលផែនការរបស់ TikTok ក្នុងការវិនិយោគ និងពង្រីកអាជីវកម្មរបស់ខ្លួននៅក្នុងប្រទេស។ នៅក្រោមច្បាប់កាណាដា រដ្ឋាភិបាលអាចវាយតម្លៃហានិភ័យដែលអាចកើតមានចំពោះសន្តិសុខជាតិពីការវិនិយោគបរទេស ដូចជា TikTok ជាដើម។ ច្បាប់នេះរារាំងរដ្ឋាភិបាលមិនឱ្យបង្ហាញព័ត៌មានលម្អិតនៃការវិនិយោគបែបនេះ។

TikTok បាននិយាយថា ខ្លួននឹងតតាំងនឹងការសម្រេចនោះនៅតុលាការ។ គួររម្លឹកថា កាណាដា បានហាមឃាត់កម្មវិធី TikTok ពីឧបករណ៍ដែលចេញដោយរដ្ឋាភិបាល ដោយនិយាយថាអេបនេះបង្ហាញពីកម្រិតហានិភ័យដែលមិនអាចទទួលយកបានចំពោះឯកជនភាព និងសុវត្ថិភាព៕