ក្រុមអ្នកតវ៉ា បានចេញធ្វើបាតុកម្មនៅភាគអាគ្នេយ៍ប្រទេសទួរគី រយៈពេលបីថ្ងៃមកហើយ កាលពីថ្ងៃពុធ ទី ៦ ខែវិច្ឆិកា បន្ទាប់ពីអភិបាលក្រុងចំនួន៣រូប មកពីគណបក្ស DEM ដែលគាំទ្រជនជាតិឃឺដ ត្រូវបានដកចេញពីមុខតំណែងរបស់ពួកគេ។

នៅក្នុងទីក្រុង បាតម៉ង់(Batman) ជាកន្លែងដែលអភិបាលក្រុង លោកស្រី Gulistan Sonuk ត្រូវបានដកចេញពីតំណែងរបស់លោកស្រី ក្រុមអ្នកតវ៉ា បានមកប្រមូលផ្តុំគ្នានៅរង្វង់មូលមួយកន្លែង ដោយពួកគេមួយចំនួនបានគប់វត្ថុផ្សេងៗទៅលើរថយន្តនគរបាល។

ជាមួយគ្នានេះ នគរបាល បានប្រើកាណុងបាញ់ទឹក ដើម្បីបំបែកក្រុមអ្នកតវ៉ា និងបានប៉ះទង្គិចជាមួយក្រុមបាតុករ។

ក្រសួងមហាផ្ទៃរបស់ប្រទេសទួរគី បាននិយាយថា ក្រសួងបានដាក់ជំនួសអភិបាលក្រុងមកពីគណបក្ស DEM នៅក្នុងទីក្រុង Mardin, ទីក្រុងBatman និងទីក្រុង Halfeti ដោយអ្នកគ្រប់គ្រងត្រូវបានតែងតាំងដោយរដ្ឋាភិបាល។

ចំណាត់ការ ដែលក្រសួងបាននិយាយថា បានកំណត់គោលដៅលើអ្នកគាំទ្រគណបក្សពលករឃឺដ (PKK) ជាក្រុមសកម្មប្រយុទ្ធក្រៅច្បាប់ ដោយបានរំលឹកឡើងវិញពីការបង្ក្រាបកាលពីពេលកន្លងទៅលើអ្នកនយោបាយឃឺដ។ ប៉ុន្តែអភិបាលក្រុងទាំងបីរូប បានបដិសេធការចោទប្រកាន់នេះ។