យោងតាមមន្ត្រីអាមេរិកពីររូប និងការជជែករវាងជនអន្តោប្រវេសន៍តាមក្រុមផ្ញើសារ WhatsApp បានឱ្យដឹងថា រដ្ឋបាលបច្ចុប្បន្នរបស់លោក Joe Biden កំពុងបង្កើតផែនការបន្ទាន់សម្រាប់កំណើនដែលអាចកើតមាននៅក្នុងច្រកព្រំដែន នៅមុនលោក Donald Trump ចូលកាន់តំណែង ខណៈជនអន្តោប្រវេសន៍កាន់តែច្រើននិយាយថា ពួកគេខ្លាចប្រធានាធិបតីជាប់ឆ្នោតថ្មីរូបនេះនឹងបិទច្រកព្រំដែន។

នៅមុនពេលលោក Trump ប្រកាសជ័យជម្នះ មន្រ្តីក្រសួងសន្តិសុខមាតុភូមិ DHS បានជួបប្រជុំអនឡាញជាមួយទីប្រឹក្សា រួមទាំងប្រធានគយ និងការការពារព្រំដែន CBP និងទីភ្នាក់ងារអនុវត្តច្បាប់អន្តោប្រវេសន៍ និងគយ ICE ដែលក្នុងនោះពួកគេបានលើកឡើងពីកង្វល់ចំពោះសន្តិសុខព្រំដែន។

ក្រុមមន្ត្រីបានរំលឹកឡើងវិញថា ក្រសួង DHS មិនទាន់មើលឃើញកំណើននៃជនអន្តោប្រវេសន៍ដែលធ្វើដំណើរចូលអាមេរិកនៅឡើយទេ ប៉ុន្តែជ័យជម្នះរបស់លោក Trump នឹងបង្កើតឱ្យមានកង្វល់នោះ ហើយក្រុម CBP និង ICE ចាំបាច់ត្រូវត្រៀមខ្លួន។

គួររម្លឹកថា លោក Trump តែងប្រើវោហាសាស្រ្តវាយប្រហារជនអន្តោប្រវេសន៍ក្នុងដំណើរនៃយុទ្ធនាការបោះឆ្នោតរបស់ខ្លួន ហើយបានគំរាមបិទព្រំដែន និងសន្យាការនិរទេសដ៏ធំក្នុងប្រវត្តិសាស្រ្តអាមេរិក៕