អាជ្ញាធរប្រទេសម៉ូហ្សំប៊ិក បានគម្រាមដាក់ពង្រាយទាហានដើម្បីទប់ស្កាត់ការតវ៉ាក្រោយការបោះឆ្នោតដ៏ហិង្សា ដែលបានកក្រើកប្រទេសនេះ បន្ទាប់ពីក្រុមប្រឆាំង បានច្រានចោលលទ្ធផលនៃការបោះឆ្នោត ដែលបានមើលឃើញថា គណបក្សកាន់អំណាច ហ្វ្រេលីម៉ូ (Frelimo) បន្តការគ្រប់គ្រងរបស់ខ្លួន។

មនុស្សរាប់ម៉ឺននាក់បានចេញតវ៉ា ចាប់តាំងពីលទ្ធផលឆ្នោតប្រធានាធិបតីត្រូវបានប្រកាសនៅថ្ងៃទី២៤ ខែតុលា ដែលបង្ហាញថា បេក្ខជនតំណាងបក្ស Frelimo លោក ដានីញែល ឆាប៉ូ (Daniel Chapo) ជាអ្នកឈ្នះទាំងស្រុង ជាមួយនឹងក្រុមប្រឆាំងគ្រោងនឹងធ្វើការតវ៉ាដ៏ធំបំផុតនៅទូទាំងរដ្ឋធានីម៉ាពុយតូ នៅថ្ងៃព្រហស្បតិ៍ (០៧ វិច្ឆិកា) នេះ។

អង្គការលើកលែងទោសអន្តរជាតិ បាននិយាយកាលពីថ្ងៃពុធថា មនុស្សយ៉ាងតិច ២០នាក់ បានស្លាប់ និងរាប់រយនាក់ទៀតរងរបួស និងត្រូវបានចាប់ខ្លួន ចាប់តាំងពីការចាប់ផ្តើមនៃបាតុកម្ម។ ក្រុមនេះបានពិពណ៌នាប្រតិកម្មរបស់រដ្ឋាភិបាលថាជាការបង្រ្កាបការតវ៉ាដ៏អាក្រក់បំផុតរបស់ប្រទេសក្នុងរយៈពេលជាច្រើនឆ្នាំ។

រដ្ឋមន្ត្រីការពារជាតិ លោក គ្រីស្តូវ៉ៅ ឈូម (Cristóvão Chume) បានគម្រាមដាក់ពង្រាយកម្លាំងយោធា ដើម្បីទប់ស្កាត់ការតវ៉ាក្រោយការបោះឆ្នោតដែលកំពុងបន្ត ដោយនិយាយថា នោះគឺជាការប៉ុនប៉ងផ្តួលរំលំរដ្ឋាភិបាលដែលជាប់ឆ្នោតតាមបែបប្រជាធិបតេយ្យ៕