ទីភ្នាក់ងារព័ត៌មានជាតិលីបង់ (NNA) បានរាយការណ៍ថា កាលពីរសៀលថ្ងៃពុធ យន្តហោះចម្បាំងអ៊ីស្រាអែល បានបើកការវាយប្រហារតាមផ្លូវអាកាសយ៉ាងខ្លាំង ចំនួន៨លើក លើតំបន់ជាយក្រុងភាគខាងត្បូងនៃទីក្រុងបេរូត បន្ទាប់ពីស្ងប់ស្ងាត់អស់រយៈពេលប៉ុន្មានថ្ងៃកន្លងទៅ។

ការវាយប្រហារតាមអាកាសរបស់អ៊ីស្រាអែល ដែលបានកំណត់គោលដៅទៅលើតំបន់នានា រួមទាំងទីក្រុង Haret Hreik និង Burj Barajneh បានចាប់ផ្តើមប្រហែលមួយម៉ោង បន្ទាប់ពីការព្រមានអំពីការជម្លៀសចេញជាលើកដំបូង ដែលចេញដោយកងទ័ពអ៊ីស្រាអែលសម្រាប់អគារចំនួន ៦ នៅជាយក្រុងភាគខាងត្បូងនៃទីក្រុងបេរូត កាលពីរសៀលថ្ងៃពុធ។

យោងតាម NNA បានឲ្យដឹងថា ការវាយប្រហារតាមផ្លូវអាកាសមួយ បានកំណត់គោលដៅទៅលើតំបន់នៅ ជិតមន្ទីរពេទ្យ Bahman ហើយមួយទៀត បានកំណត់គោលដៅជុំវិញព្រលានយន្តហោះបេរូត។

ពុំទាន់មានរបាយការណ៍ពីអ្នកស្លាប់និងរបួសភ្លាមៗនោះទេ។

កាលពីថ្ងៃពុធផងដែរ អគ្គលេខាធិការហេសបូឡាលោក Sheikh Naim Qassem បានថ្លែងនៅក្នុងសុន្ទរកថាតាមទូរទស្សន៍ថា ក្រុមរបស់ខ្លួន «ពឹងផ្អែកលើសមរភូមិជាជាងការចរចា» ដើម្បីបញ្ឈប់សង្គ្រាមជាមួយអ៊ីស្រាអែល ដោយបន្ថែមថា ការចរចាណាមួយ នឹងផ្តោតទៅលើការបញ្ចប់ «ការឈ្លានពាន» របស់អ៊ីស្រាអែល និងការរំលោភលើអធិបតេយ្យភាពជាតិរបស់ប្រទេសលីបង់។