ប្រព័ន្ធផ្សព្វផ្សាយរដ្ឋរបស់កូរ៉េខាងជើង នៅថ្ងៃព្រហស្បតិ៍នេះ បានរក្សាភាពស្ងៀមស្ងាត់អំពីជ័យជម្នះក្នុងការបោះឆ្នោតរបស់អតីតប្រធានាធិបតីអាមេរិក លោក ដូណាល់ ត្រាំ ដើម្បីទទួលបានអាណត្តិប្រធានាធិបតីទី២។

អ្នកកាន់ទង់គណបក្សសាធារណរដ្ឋ បានឈ្នះការបោះឆ្នោតប្រធានាធិបតីកាលពីថ្ងៃអង្គារ ដោយក្លាយជាប្រធានាធិបតីអាមេរិកទី២ ដែលមិនធ្លាប់មានអាណត្តិពីរជាប់គ្នា បន្ទាប់ពីបានឈ្នះនៅរដ្ឋប្រទាញប្រទង់ សំខាន់ៗ រួមមានរដ្ឋ Pennsylvania, Georgia និងរដ្ឋ North Carolina។

សារព័ត៌មានសំខាន់ៗរបស់កូរ៉េខាងជើង ដូចជាទីភ្នាក់ងារសារព័ត៌មានមជ្ឈិមកូរ៉េ (KCNA) កាសែតប្រចាំថ្ងៃ Rodong Sinmun និងទូរទស្សន៍មជ្ឈិមកូរ៉េ មិនបានរាយការណ៍អំពីជ័យជម្នះការបោះឆ្នោតប្រធានាធិបតីរបស់លោក ត្រាំ ទេ គិតត្រឹមម៉ោង ៧ព្រឹក ថ្ងៃព្រហស្បតិ៍នេះទេ។

កាលពីមុន កូរ៉េខាងជើង បានតាមយកព័ត៌មានអំពីលទ្ធផលបោះឆ្នោតប្រធានាធិបតីអាមេរិក ដោយប្រយោល តាមធម្មតា បន្ទាប់ពីលទ្ធផលត្រូវបានប្រកាស។

សម្រាប់ជ័យជម្នះការបោះឆ្នោតទាំង២លើករបស់លោកអតីតប្រធានាធិបតី បារ៉ាក់ អូបាម៉ា សារព័ត៌មាន Rodong Sinmun ដែលជាកាសែតសំខាន់របស់កូរ៉េខាងជើងដែលផ្តោតលើទស្សនិកជនក្នុងស្រុក បានចេញផ្សាយលទ្ធផល រយៈពេល ៤ថ្ងៃ បន្ទាប់ពីការប្រកាសជាផ្លូវការ។

នៅពេលដែលលោក ត្រាំ បានឈ្នះតំណែងប្រធានាធិបតីជាលើកដំបូង ក្នុងឆ្នាំ ២០១៦ កូរ៉េខាងជើងបានរាយការណ៍អំពីលទ្ធផលដោយប្រយោល រយៈពេល ១១ថ្ងៃ បន្ទាប់ពីថ្ងៃបោះឆ្នោតតាមរយៈការអត្ថាធិ ប្បាយរបស់សារព័ត៌មាន Rodong Sinmun ដែលបានរិះគន់សារអបអរសាទររបស់អតីតប្រធានាធិបតីកូរ៉េខាងត្បូងលោកស្រី Park Geun-hye ទៅកាន់លោក ត្រាំ។

ចំណែក នៅពេលដែលលោក ចូ បៃដិន (Joe Biden) បានឈ្នះតំណែងប្រធានាធិបតី ក្នុងឆ្នាំ ២០០០ កូរ៉េខាងជើង បានរក្សាភាពស្ងៀមស្ងាត់អស់រយៈពេលជាងពីរខែ ដោយគ្រាន់តែនិយាយដោយប្រយោលតាមរយៈបណ្តាញផ្សព្វផ្សាយរបស់កូរ៉េខាងជើង DPRK Today បន្ទាប់ពីពិធីស្បថចូលកាន់តំណែងជាផ្លូវការរបស់លោក បៃដិន។