យោងតាមប្រភពព័ត៌មានរបស់អ៊ីស្រាអែល បានឲ្យដឹងថា ក្រុមហេសបូឡា បានបាញ់រ៉ូកែតប្រហែល ១២០គ្រាប់ ទៅលើភាគខាងជើង និងភាគកណ្តាលអ៊ីស្រាអែលពេញមួយថ្ងៃពុធ ដោយបានបណ្តាលឲ្យមានអ្នករងរបួស និងការខូចខាត។

យោធាអ៊ីស្រាអែល បាននិយាយថា គ្រាប់រ៉ូកែតប្រហែល ៥០គ្រាប់ ដែលបានបាញ់ចេញពីប្រទេសលីបង់ ក្នុងរយៈពេល ១៥នាទី បានត្រូវចំទីតាំងជាច្រើន នៅភាគខាងជើងតំបន់ Galilee របស់អ៊ីស្រាអែល ដោយបន្ថែមថា ពួកវាមួយចំនួន ត្រូវស្ទាក់ចាប់បាន។

ទន្ទឹមនឹងនេះ ទូរទស្សន៍ Kan TV ដែលគ្រប់គ្រងដោយរដ្ឋរបស់អ៊ីស្រាអែល បានរាយការណ៍ថា គ្រាប់រ៉ូកែតមួយចំនួន បានធ្លាក់ទៅលើសហគមន៍ Avivim ដែលជាសហគមន៍មួយនៅជាប់នឹងមូលដ្ឋានយោធា នៅតំបន់ Upper Galilee ដែលក្រុមហេសបូឡា បានកំណត់គោលដៅម្តងហើយម្តងទៀត។

ទូរទស្សន៍ Kan TV បាននិយាយថា មនុស្សជាច្រើននាក់ បានរងរបួសធ្ងន់ ហើយត្រូវបានគេបញ្ជូនទៅមន្ទីរពេទ្យ ខណៈអាជ្ញាធរមូលដ្ឋាន បានបញ្ជាក់ថា ផ្ទះប្រហែល ១០ខ្នង ត្រូវរងការវាយប្រហារ និងបានបបង្កឲ្យអគ្គិភ័យឆាបឆេះឡើង។

នៅក្នុងការវាយប្រហារដាច់ដោយឡែកមួយ មីស៊ីលមួយគ្រាប់ ត្រូវបានបាញ់ចេញពីប្រទេសលីបង់ឆ្ពោះទៅកាន់ភាគកណ្តាលអ៊ីស្រាអែល ដោយបានបង្កសំឡេងស៊ីរ៉ែនរោទិ៍ឡើង នៅទូទាំងតំបន់ Gush Dan ដែលជាកន្លែងអាកាសយានដ្ឋានអន្តរជាតិ Ben Gurion និងទីក្រុង និងសហគមន៍រាប់សិប បានតាំងនៅ។ ក្រុមអ្នកស្រុករាយការណ៍ថា បានឮសំឡេងផ្ទុះជាច្រើនគ្រាប់។