ប្រទេសចិនបានសម្តែងការគោរព ចំពោះលទ្ធផលបោះឆ្នោតរបស់សហរដ្ឋអាមេរិក និងបានអបអរ ចំពោះជ័យជម្នះរបស់លោក Donald Trump ខណៈដែលសារព័ត៌មានផ្លូវការមួយ បានអំពាវនាវឲ្យមានវិធីសាស្រ្ត «ប្រាកដនិយម» ចំពោះទំនាក់ទំនងចិន-អាមេរិក ដើម្បីដោះស្រាយការយល់ឃើញខុសគ្នារបស់ប្រទេសទាំង២ ឲ្យបានត្រឹមត្រូវ។

គួរបញ្ជាក់ថា លោក Trump ជាបេក្ខជនខាងគណបក្សសាធារណរដ្ឋដែលបានសន្យាថា នឹងអនុវត្តវិធានការពន្ធយ៉ាងតឹងរ៉ឹង ដណ្តើមបានកៅអីសេតវិមានមកវិញ ជាមួយនឹងជ័យជម្នះយ៉ាងលើសលុបលើបេក្ខជនរបស់គណបក្សប្រជាធិបតេយ្យ គឺលោកស្រី Kamala Harris ក្នុងការបោះឆ្នោត កាលពីថ្ងៃទី៥ ខែវិច្ឆិកា។

ហើយពាក់ព័ន្ធទៅនឹងលទ្ធផលបោះឆ្នោតនោះ អ្នកនាំពាក្យក្រសួងការបរទេសចិន កាលពីល្ងាចថ្ងៃពុធ (ទី៦ ខែវិច្ឆិកា) បានឲ្យដឹងនៅក្នុងសេចក្តីថ្លែងការណ៍ថា៖ «យើងគោរពចំពោះការជ្រើសរើសរបស់ប្រជាជនអាមេរិក និងអបអរសាទរលោក Trump ដែលឈ្នះការបោះឆ្នោតប្រធានាធិបតី»។

នៅថ្ងៃទី៦ ខែវិច្ឆិកានោះ សារព័ត៌មានគ្រប់គ្រងដោយរដ្ឋ China Daily បានលើកឡើងនៅក្នុងវិចារណកថាមួយថា តំណែងប្រធានាធិបតីលើកទី២ របស់លោក Trump អាចបង្ហាញនូវ «ការចាប់ផ្តើមថ្មី ក្នុងទំនាក់ទំនងចិន-អាមេរិក ប្រសិនបើឱកាសដែលត្រូវបានផ្តល់ឲ្យ មិនត្រូវបានបំផ្លាញចោលនោះទេ»។

សារព័ត៌មាននេះ បានបន្តថា រដ្ឋបាលអាមេរិកបន្ទាប់ អាចពង្រឹងកិច្ចសន្ទនា និងការប្រាស្រ័យទាក់ទងជាមួយប្រទេសចិន ដើម្បីដោះស្រាយការយល់ឃើញខុសគ្នា «ដែលមានចាប់ពីបញ្ហាកោះតៃវ៉ាន់ រហូតដល់ពាណិជ្ជកម្ម និងសមុទ្រចិនខាងត្បូង»។

សារព័ត៌មាន China Daily បានបន្ថែមថា គោលនយោបាយ និង «ការយល់ខុស» របស់សហរដ្ឋអាមេរិក ចំពោះប្រទេសចិន បានបង្កជាបញ្ហាប្រឈមយ៉ាងធំដល់ទំនាក់ទំនង រវាងប្រទេសទាំង ២ ដោយបញ្ជាក់ថា «វិធីសាស្រ្តប្រកបដោយភាពប្រាកដនិយម ចំពោះទំនាក់ទំនងទ្វេភាគី គឺមានសារៈសំខាន់ ក្នុងការរកផ្លូវចេញពីភាពស្មុគស្មាញនៃបញ្ហាប្រឈមពិភពលោក»៕