ទីភ្នាក់ងារព័ត៌មានពាក់កណ្តាលផ្លូវការ Fars បានរាយការណ៍កាលពីថ្ងៃពុធថា មនុស្ស ៤នាក់ ត្រូវបានកាត់ទោសប្រហារជីវិត ដោយតុលាការបដិវត្តន៍មួយ នៅភាគពាយ័ព្យប្រទេសអ៊ីរ៉ង់ ជុំវិញការចោទប្រកាន់ពីបទចារកម្មឲ្យអ៊ីស្រាអែល។

សារព័ត៌មាន Fars បាននិយាយថា ជនជាប់ចោទបីនាក់ ដែលសញ្ជាតិរបស់ពួកគេ តុលាការមិនបានផ្តល់ឲ្យនោះ ត្រូវបានចោទប្រកាន់ថា បានជួយទីភ្នាក់ងារចារកម្មរបស់អ៊ីស្រាអែល Mossad ផ្លាស់ទីឧបករណ៍ដែលបានប្រើ ក្នុងការធ្វើឃាតអ្នកវិទ្យាសាស្ត្រនុយក្លេអ៊ែរអ៊ីរ៉ង់លោក Mohsen Fakhrizadeh កាលពីឆ្នាំ២០២០។

លោក Fakhrizadeh ត្រូវបានសេវាចារកម្មលោកខាងលិចមើលឃើញថា ជាមេគំនិតនៃកម្មវិធីសម្ងាត់របស់អ៊ីរ៉ង់ ក្នុងការអភិវឌ្ឍសមត្ថភាពអាវុធនុយក្លេអ៊ែរ។ សាធារណៈរដ្ឋឥស្លាម បានបដិសេធជាយូរមកហើយចំពោះមហិច្ឆតាបែបនេះ។

ដោយដកស្រង់ប្រភពស៊ើបការណ៍ សារព័ត៌មាន Jewish Chronicle បានរាយការណ៍កាលពីខែកុម្ភៈ ឆ្នាំ ២០២១ ថា លោក Fahrizadeh ត្រូវបានសម្លាប់ដោយកាំភ្លើងមួយដើមមានទម្ងន់មួយតោន ដែលបានរត់ពន្ធចូលទៅក្នុងប្រទេសអ៊ីរ៉ង់ ជាបំណែកៗដោយភ្នាក់ងារ Mossad ដែលមានជនជាតិអ៊ីស្រាអែល និង     អ៊ីរ៉ង់។

អ៊ីស្រាអែលបានបដិសេធមិនធ្វើអត្ថាធិប្បាយអំពីពេលវេលានៃការសម្លាប់គាត់ទេ ហើយកាលពីថ្ងៃពុធ អ្នកនាំពាក្យរដ្ឋាភិបាលអ៊ីស្រាអែល បាននិយាយជាការឆ្លើយតបនឹងរបាយការណ៍ Farsថា៖ «យើងមិនដែលធ្វើអត្ថាធិប្បាយលើបញ្ហាបែបនេះទេ។ ពុំមានការផ្លាស់ប្តូរគោលជំហររបស់យើងទេ»។

សារព័ត៌មាន Fars បាននិយាយថា ចុងចោទទី៤ ដែលត្រូវបានកាត់ទោសប្រហារជីវិត ត្រូវបានភ្ជាប់ទៅនឹងករណីចារកម្មដែលមិនបានបញ្ជាក់ច្បាស់លាស់មួយផ្សេងទៀត។