សេតវិមានបានឲ្យដឹងនៅក្នុងសេចក្តីថ្លែងការណ៍មួយថា ប្រធានាធិបតី លោក Joe Biden បាននិយាយជាមួយអតីតប្រធានាធិបតី លោក Donald Trump តាមទូរសព្ទ កាលពីថ្ងៃពុធ (ទី៦ ខែវិច្ឆិកា) ដើម្បីអបអរសាទររូបលោក ដែលបានឈ្នះតំណែងប្រធានាធិបតី។

សេតវិមានបានប្រាប់ថា «លោកប្រធានាធិបតី Biden បានសម្តែងការប្តេជ្ញាចិត្តរបស់លោក ក្នុងការធានាឲ្យមានការផ្លាស់ប្ដូរតំណែងដោយរលូន និងបានសង្កត់ធ្ងន់ពីសារៈសំខាន់នៃការធ្វើការ ដើម្បីធ្វើឲ្យប្រទេសមានការរួបរួមគ្នា»។

ចំណែកអ្នកនាំពាក្យយុទ្ធនាការរបស់លោក Trump គឺលោក Steven Cheung បាននិយាយថា ការជួបគ្នា «នឹងកើតឡើងក្នុងពេលឆាប់ៗ»។ លោក Cheung បានប្រាប់នៅក្នុងសេចក្តីថ្លែងការណ៍ថា៖ «ប្រធានាធិបតី លោក Joe Biden បានទូរសព្ទទៅប្រធានាធិបតី Donald J. Trump ដើម្បីអបអរចំពោះជ័យជម្នះរបស់លោក ហើយបានបន្តដោយការអញ្ជើញទៅកាន់សេតវិមាន ដើម្បីធានាឲ្យមានការផ្លាស់ប្តូរតំណែងដោយរលូន រវាងរដ្ឋបាលបច្ចុប្បន្ន និងរដ្ឋបាលខាងមុខ។ លោកប្រធានាធិបតី Trump ទន្ទឹងរង់ចាំកិច្ចប្រជុំនេះ ដែលនឹងកើតឡើងក្នុងពេលឆាប់ៗនេះ ហើយបានសរសើរយ៉ាងខ្លាំង ចំពោះការហៅទូរសព្ទនេះ»។

ជាមួយគ្នានេះ សេតវិមានបានឲ្យដឹងទៀតថា លោក Biden ក៏បាននិយាយទៅកាន់អនុប្រធានាធិបតី លោកស្រី Kamala Harris តាមទូរសព្ទដូចគ្នាដែរ នៅថ្ងៃពុធនោះ ដើម្បីអបអរលោកស្រី ចំពោះ «ការធ្វើយុទ្ធនាការជាប្រវត្តិសាស្ត្ររបស់លោកស្រី»៕