រដ្ឋាភិបាលចម្រុះដែលកំពុងកាន់អំណាចរបស់ប្រទេសអាល្លឺម៉ង់ បានដួលរលំ កាលពីថ្ងៃពុធ (ទី៦ ខែវិច្ឆិកា) ខណៈដែលអធិការបតី លោក Olaf Scholz បានបញ្ចប់តំណែងរដ្ឋមន្ត្រីហិរញ្ញវត្ថុរបស់លោក និងបានបើកផ្លូវឲ្យមានការបោះឆ្នោតមុនអាណត្តិ ដោយការសម្រេចនេះបង្កឲ្យមានភាពវឹកវរផ្នែកនយោបាយ នៅក្នុងប្រទេសសេដ្ឋកិច្ចដ៏ធំបំផុតជាងគេរបស់អឺរ៉ុប ពោលគឺមានរយៈប៉ុន្មានម៉ោងបន្ទាប់ពីលោក Donald Trump បានឈ្នះការបោះឆ្នោតប្រធានាធិបតីសហរដ្ឋអាមេរិក។

បន្ទាប់ពីដកតំណែងរដ្ឋមន្ត្រីហិរញ្ញវត្ថុរបស់លោក Christian Lindner របស់គណបក្ស Free Democrats (FDP) លោក Scholz ត្រូវបានគេរំពឹងថា នឹងដឹកនាំរដ្ឋាភិបាលសំឡេងភាគតិចជាមួយគណបក្ស Social Democrats និង Greens ដែលជាគណបក្សធំជាងគេបំផុតទី២។

លោក Scholz នឹងត្រូវពឹងផ្អែកលើសំឡេងភាគច្រើនរបស់សភាដែលត្រូវរួមគ្នាយ៉ាងរួសរាន់ ដើម្បីអនុម័តច្បាប់នេះ ហើយរូបលោកគ្រោងនឹងរៀបចំការបោះឆ្នោតផ្ដល់ទំនុកចិត្តសភា នៅក្នុងរដ្ឋាភិបាលរបស់លោក នាថ្ងៃទី១៥ ខែមករា ដែលអាចបង្កើតឲ្យមានការបោះឆ្នោតមុនអាណត្តិ នៅដំណាច់ខែមីនា។

គួរបញ្ជាក់ថា ការដួលរលំនៃសម្ព័ន្ធភាព ៣គណបក្សរបស់លោក Scholz បញ្ចប់ជម្លោះជាច្រើនខែ ជុំវិញគោលនយោបាយថវិកា និងទិសដៅសេដ្ឋកិច្ចរបស់ប្រទេសអាល្លឺម៉ង់ ដោយប្រជាប្រិយភាពរបស់រដ្ឋាភិបាល បានធ្លាក់ចុះ ហើយឥទ្ធិពលរបស់ក្រុមស្តាំនិយមជ្រុល និងឆ្វេងនិយមជ្រុល បានកើនឡើង។

ពាក់ព័ន្ធនឹងការបណ្តេញលោក Lindner លោក Scholz បាននិយាយថា ការសម្រេចរបស់លោក គឺដោយសារអាកប្បកិរិយារារាំង ជុំវិញវិវាទថវិកា ដោយចោទប្រកាន់រដ្ឋមន្ត្រីរូបនេះថា បានយកគណបក្សសំខាន់ជាងប្រទេសជាតិ និងរារាំងច្បាប់នេះ ដោយហេតុផលមិនសមទំនង៕