ប្រហែលជាមិនមានមេដឹកនាំប៉ុន្មានរូបនោះទេ នៅតំបន់អាស៊ី រីករាយពេញចិត្តនៅពេលឃើញលោក Donald Trump វិលត្រឡប់ទៅអង្គុយកៅអីសេតវិមានវិញជាងនាយករដ្ឋមន្ត្រីឥណ្ឌា លោក Narendra Modi។

លោក Modi បានក្លាយជាមេដឹកនាំដ៏សំខាន់ដំបូងគេ ដែលអបអរលោក Trump ចំពោះជ័យជម្នះ «ជាប្រវត្តិសាស្ត្រ» របស់លោក នៅក្នុងការបោះឆ្នោត កាលពីថ្ងៃអង្គារ (ទី៥ ខែវិច្ឆិកា) ដោយបានបង្ហោះសាររបស់លោករួមជាមួយនឹងរូបថតដែលឥស្សរជនទាំង២ កាន់ដៃគ្នា នៅឯកន្លែងជួបជុំអ្នកគាំទ្ររាប់ពាន់នាក់ នៅទីក្រុង Houston កាលពី ៥ឆ្នាំមុន។ ហើយមិនបង្អង់យូរ លោកបានទូរសព្ទទៅនិយាយសម្ដែងការអបអរភ្លាមៗ។

ការវិលទៅកាន់អំណាចជាថ្មីរបស់លោក Trump ផ្តល់ឱកាសឲ្យលោក Modi លើកកម្ពស់មុខមាត់របស់ឥណ្ឌាជាមួយសហរដ្ឋអាមេរិក និងសម្ព័ន្ធមិត្តរបស់ខ្លួន ដែលប្រទេសទាំងនោះបានបង្កើនការត្រួតពិនិត្យនាពេលថ្មីៗនេះ ជុំវិញទំនាក់ទំនងយ៉ាងជិតស្និទ្ធជាមួយប្រធានាធិបតីរុស្ស៊ី លោក Vladimir Putin និងការមានចំណែករួមរបស់ប្រទេសនេះ ក្នុងអំពើហិង្សា ប្រឆាំងនឹងសកម្មជនផ្ដាច់ខ្លួនរបស់សាសនា Sikh នៅសហរដ្ឋអាមេរិក និងកាណាដា។ នាយករដ្ឋមន្ត្រីកាណាដា លោក Justin Trudeau កាលពីឆ្នាំមុន បានចោទប្រកាន់ថា ភ្នាក់ងាររដ្ឋាភិបាលឥណ្ឌា បានជាប់ពាក់ព័ន្ធក្នុងការសម្លាប់អ្នកប្រឆាំងដែលរស់នៅក្រៅប្រទេស ហើយសំណុំរឿងនេះ កំពុងដំណើរការតាមរយៈតុលាការអាមេរិក និងកាណាដា។

មន្ត្រីនៅទីក្រុង New Delhi ដែលសុំនិយាយក្នុងលក្ខខណ្ឌមិនបញ្ចេញឈ្មោះ រំពឹងថា រដ្ឋបាលថ្មីរបស់លោក Trump នឹងមិនសូវគិតគូរខ្លាំង ក្នុងការទាមទារឲ្យមានការទទួលខុសត្រូវពីរដ្ឋាភិបាលឥណ្ឌា ចំពោះការជាប់ពាក់ព័ន្ធក្នុងការសម្លាប់ក្រៅប្រព័ន្ធតុលាការ នៅកាណាដា និងសហរដ្ឋអាមេរិក។ រដ្ឋបាលលោក Joe Biden បាន និងកំពុងជំរុញឲ្យឥណ្ឌាស៊ើបអង្កេត និងកាត់ទោសមន្ត្រីដែលត្រូវបានចោទប្រកាន់ថា មានពាក់ព័ន្ធក្នុងករណីនេះ។ តែយ៉ាងណាក្ដី ឥណ្ឌាបានបដិសេធជាផ្លូវការថា មិនមានគម្រោងការធ្វើឃាតណាមួយឡើយ។

ហើយជាមួយគ្នានេះ បណ្ដាអ្នកវិភាគ និងមន្ត្រីនានា ជឿជាក់ថា សហរដ្ឋអាមេរិកក្រោមការដឹកនាំរបស់លោក Trump នឹងបន្តកិច្ចខិតខំប្រឹងប្រែងដែលមានរយៈពេលជាច្រើនឆ្នាំមកហើយនោះ ក្នុងការធ្វើឲ្យប្រទេសឥណ្ឌាក្លាយជាដៃគូយុទ្ធសាស្ត្រ ដើម្បីទប់ទល់នឹងទីក្រុងប៉េកាំងដែលមានឥទ្ធិពលកាន់តែខ្លាំងឡើងៗ ជាកិច្ចប្រឹងប្រែងដែលបានផ្ដល់ភាពចំណេញដល់ឥណ្ឌា ដោយការទាក់ទាញបាននូវការវិនិយោគដ៏ធំថ្មីពីសំណាក់បណ្ដាក្រុមហ៊ុនអាមេរិក ដូចជាក្រុមហ៊ុន Apple Inc ជាដើម៕