វាយកូនឃ្លីលើតុ៖ ជាង ២សប្ដាហ៍មកហើយដែលក្រុមជម្រើសជាតិកីឡាវាយកូនឃ្លីលើតុ បានធ្វើការប្រមូលផ្ដុំហ្វឹកហាត់លក្ខណៈបិទខ្ទប់នៅពហុកីឡដ្ឋានជាតិមរតកតេជោ ខណៈគុណផលកម្លាំងកាយពុំទាន់ស្ដារបាននោះទេ តែរីកចម្រើនផ្នែកគុណផលបច្ចេកទេសគួរឲ្យកត់សម្គាល់។ នេះបើតាមការបញ្ជាក់របស់លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា។
លោក ស៊ុន សុទ្ធារិទ្ធ បានបញ្ជាក់ថា សម្រាប់ការបិទខ្ទប់ហ្វឹកហាត់នេះ កីឡាករ-កីឡាការិនីម្នាក់បានសម្រុកហ្វឹកហាត់ខ្លាំង ១ថ្ងៃ ៣ពេល ដើម្បីបង្កើនគុណផលកម្លាំងកាយ និងបច្ចេកទេស។ បន្ទាប់ពីឆ្លងកាត់ការហ្វឹកហាត់មួយរយៈពេលកន្លងមក លោកសង្កេតឃើញក្រុមជម្រើសជាតិវាយកូនឃ្លីលើតុកម្ពុជាមានការរីកច្រើនលើផ្នែកបច្ចេកទេស បន្ទាប់ពីពួកគេខកខានហ្វឹកហាត់ផ្ទាល់ជាមួយសម្ភារៈជិត ១ឆ្នាំកន្លងមក។ លោកសង្ឃឹមថា ការហ្វឹកហាត់ជុំគ្នានេះនឹងជំរុញសិទ្ធផលកីឡាករ-កីឡាការិនីឲ្យកាន់តែរីកចម្រើន ទោះបីបច្ចុប្បន្នគុណផលកម្លាំងកាយរបស់ពួកគេមិនទាន់កើនឡើងក៏ដោយ។ ពិសេសដោយមានការយកចិត្តទុកដាក់របស់ថ្នាក់ដឹកនាំ សហព័ន្ធ គ្រូបង្វឹក ក៏ដូចជាការខិតខំប្រឹងរបស់កីឡាករ-កីឡាការិនីគ្រប់រូប លោកជឿជាក់ថា ពួកគេនឹងមានសមត្ថភាពគ្រប់គ្រាន់ដើម្បីឈានទៅដណ្ដើមលទ្ធផលល្អប្រសើរជូនជាតិ ក្នុងព្រឹត្តិការណ៍ស៊ីហ្គេមឆ្នាំ២០២៣ នៅកម្ពុជា។
គួរបញ្ជាក់ថា អំឡុងពេលបិទខ្ទប់ប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោរយៈពេល ៣ខែសម្រាប់កីឡាករ-កីឡាការិនីជម្រើសជាតិវាយកូនឃ្លីលើតុកម្ពុជា ក្រៅពីទទួលបានប្រាក់ខែជម្រើសជាតិ ពួកគេក៏ទទួលបានប្រាក់ឧបត្ថម្ភបន្ថែម ១៥០ដុល្លារក្នុង ១ខែពីឯកឧត្តមនាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
