ស៊ីហ្គេម៖ វៀតណាមបានកំណត់រៀបចំការប្រកួតកីឡាស៊ីហ្គេមលើកទី៣១ នាពាក់កណ្ដាលខែឧសភា ឆ្នាំ២០២២ ស្របពេលបណ្ដាប្រទេសអាស៊ានបានគាំទ្រឲ្យកម្ពុជា ធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ចាប់ពីខែធ្នូ ឆ្នាំ២០២១។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC)។
ឯកឧត្តម វ៉ាត់ ចំរើន បានមានប្រសាសន៍ថា ក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍កាលពីថ្ងៃទី១៨ ខែតុលាម្សិលមិញ គណៈកម្មាធិការជាតិអូឡាំពិកវៀតណាមបានអះអាងថា ស៊ីហ្គេមលើកទី៣១ នឹងត្រូវធ្វើនៅពាក់កណ្ដាលខែឧសភា ឆ្នាំ២០២២ ប៉ុន្ដែមិនទាន់កំណត់ថ្ងៃប្រកួតនោះទេ ដោយពេលវេលាច្បាស់លាស់វៀតណាមនឹងផ្ដល់លិខិតផ្លូវការ ដល់បណ្ដាប្រទេសសមាជិកក្នុងពេលឆាប់ៗខាងមុខ។ ឯកឧត្តមបន្ដថា ដំណាលគ្នានឹងការអះអាងត្រូវរៀបចំស៊ីហ្គេមលើកទី៣១ នាពាក់កណ្ដាលឆ្នាំក្រោយនេះដោយសារកៀកនឹងកាលបរិច្ឆេទរបស់ម្ចាស់ផ្ទះបន្ដវេណគឺកម្ពុជា បណ្ដាប្រទេសអាស៊ានក៏បានគាំទ្រឲ្យកម្ពុជា ធ្វើជាសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ចាប់ពីធ្នូ ឆ្នាំ២០២១ តទៅ ដើម្បីឲ្យកម្ពុជាបានបន្ដការងាររបស់ខ្លួនដោយផ្លូវការ និងពេញសិទ្ធក្នុងដំណើរឆ្ពោះទៅស៊ីហ្គេមឆ្នាំ២០២៣ ផងដែរ។ អគ្គលេខាធិការគណៈកម្មាធិការជាតិ CAMSOC ដដែលបានបញ្ជាក់ថា ទាំងការអះអាងនឹងរៀបចំស៊ីហ្គេមនាពាក់ កណ្ដាលខែឧសភា ឆ្នាំ២០២២ របស់ភាគីវៀតណាម ក៏ដូចជាការឲ្យកម្ពុជាធ្វើសហប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ សុទ្ធតែទទួលបានការគាំទ្រពីបណ្ដាប្រទេសអាស៊ាន គ្រាន់តែការធ្វើសហប្រធាននេះត្រូវរង់ចាំការសម្រេចផ្លូវការ របស់ក្រុមប្រឹក្សាសហព័ន្ធកីឡាអាស៊ីអាគ្នេយ៍នាខែធ្នូខាងមុខ។
គួរដឹងថា ស៊ីហ្គេមលើកទី៣១ នៅវៀតណាមដំបូងឡើយត្រូវរៀបចំពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១ ខាងមុខ។ ប៉ុន្ដែដោយសារបញ្ហាកូវីដ-១៩ វៀតណាមបានស្នើបណ្ដាប្រទេសសមាជិកអាស៊ាន ក្នុងការពន្យារពេលទៅឆ្នាំក្រោយកាលពីខែមិថុនាកន្លងទៅ។ តែដោយម្ចាស់ផ្ទះវៀតណាមមិនទាន់កំណត់កាលបរិច្ឆេទច្បាស់លាស់ ក្រុមប្រឹក្សាកីឡាអាស៊ីអាគ្នេយ៍ក៏បានដាក់ឱសាទវាទឲ្យវៀតណាមត្រឹមខែតុលានេះ ដើម្បីកំណត់ពេលវេលារៀបចំស៊ីហ្គេម រហូតដល់កិច្ចប្រជុំកាលពីម្សិលមិញទើបវៀតណានបានអះអាងច្បាស់លាស់ថា នឹងធ្វើនៅពាក់កណ្ដាលខែឧសភា ឆ្នាំ២០២២៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
