ប្រធានាធិបតីអ៊ុយក្រែន លោក វ្លូឌីមី ហ្សេឡិនស្គី (Volodymyr Zelenskiy) បាននិយាយកាលពីថ្ងៃព្រហស្បតិ៍ (០៧ វិច្ឆិកា) ថា លោកមិនបានដឹងពីព័ត៌មានលម្អិតនៃផែនការរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ ដើម្បីបញ្ចប់សង្រ្គាមអ៊ុយក្រែនឱ្យបានឆាប់រហ័សនោះទេ ហើយលោកជឿជាក់ថា ការបញ្ចប់យ៉ាងឆាប់រហ័សណាមួយនឹងមានសម្បទានសំខាន់ៗពីទីក្រុងគីវ។

មេដឹកនាំអ៊ុយក្រែនរូបនេះ បានប្រាប់សន្និសីទសារព័ត៌មាននៅឯកិច្ចប្រជុំកំពូលសហគមន៍នយោបាយអឺរ៉ុបនៅទីក្រុងប៊ុយដាប៉ែសថា លោកជឿថាលោក ត្រាំ ចង់បញ្ចប់សង្រ្គាមជាមួយរុស្ស៊ីយ៉ាងឆាប់រហ័ស ប៉ុន្តែថាលោកមិនធ្លាប់បានពិភាក្សាពីផែនការនោះជាមួយប្រធានាធិបតីអាមេរិកថ្មីរូបនេះទេ។

លោកលើកឡើងថា "ប្រសិនបើបញ្ចប់សង្រ្គាមលឿន នោះបានន័យថាមានការខាតបង់សម្រាប់អ៊ុយក្រែន ហើយយើងក៏មិនទាន់យល់ និងមិនទាន់ដឹងដែរថាតើត្រូវបញ្ចប់ដោយបៀបណា"។

ជ័យជម្នះក្នុងការបោះឆ្នោតរបស់លោក ត្រាំ នៅសប្តាហ៍នេះ បានបង្កើនអារម្មណ៍នៃភាពមិនប្រាកដប្រជាជាខ្លាំងសម្រាប់កិច្ចខិតខំប្រឹងប្រែងសង្រ្គាមរបស់អ៊ុយក្រែន ក្នុងពេលដ៏គ្រោះថ្នាក់មួយ ខណៈកងទ័ពរបស់ទីក្រុងមូស្គូ កំពុងវាយរុលយ៉ាងលឿនក្នុងពេលជាច្រើនខែ។

លោក Zelenskiy ស្ថិតក្នុងចំណោមមេដឹកនាំពិភពលោកដំបូងគេដែលអបអរសាទរប្រធានាធិបតីជាប់ឆ្នោតថ្មីរូបនោះ ដែលនៅលើផ្លូវនៃយុទ្ធនាការរបស់ខ្លួន លោក ត្រាំ បានរិះគន់ទំហំនៃការគាំទ្រផ្នែកយោធា និងហិរញ្ញវត្ថុរបស់អាមេរិកសម្រាប់ទីក្រុងគីវ ហើយបានប្តេជ្ញាថានឹងបញ្ចប់សង្រ្គាមឱ្យបានឆាប់រហ័ស ប៉ុន្តែមិនបញ្ជាក់ថាប្រើមធ្យោបាយអ្វីនោះឡើយ៕