ទីភ្នាក់ងារឃ្លាំមើលភ្នំភ្លើងនៅប្រទេសឥណ្ឌូនេស៊ី បាននិយាយថា ភ្នំភ្លើងមួយនៅភាគខាងកើតប្រទេសបានផ្ទុះឡើងជាថ្មីម្តងទៀត ដោយបានបានបញ្ចេញផេះមានកម្ពស់រហូតដល់ជាង ៨.០០០ ម៉ែត្រ ឡើងទៅលើអាកាស។

មន្ត្រីក្នុងតំបន់ បាននិយាយថា រហូតមកដល់ពេលនេះ ពុំទាន់មានរបាយការណ៍អំពីអ្នកស្លាប់ និងរងរបួសទេ ហើយក៏ពុំមានហានិភ័យនៃរលកយក្សស៊ូណាមិ ដែរ។

មជ្ឈមណ្ឌលសម្រាប់ការកាត់បន្ថយគ្រោះមហន្តរាយភ្នំភ្លើងនិងភូគព្ភសាស្ត្រ និយាយថា ការផ្ទុះភ្នំភ្លើងនេះ បានកើតឡើងនៅភ្នំ Lewotobi Laki-laki នៅកោះ Flores កាលពីថ្ងៃព្រហស្បតិ៍។

មនុស្សជាង៥.៨០០នាក់ក្នុងចំណោម ១៦.០០០នាក់ រស់នៅក្នុងតំបន់ក្បែរភ្នំភ្លើង ត្រូវបានជម្លៀសចេញ។ អាជ្ញាធរតំបន់ បានបង្កើនស្ថានភាពព្រមានដល់កម្រិតខ្ពស់បំផុត មុនពេលការផ្ទុះ កាលពីថ្ងៃព្រហស្បតិ៍។

អាជ្ញាធរ ក៏បានបង្កើតតំបន់បម្រាមមិនឲ្យចូល លាតសន្ធឹងក្នុងចម្ងាយ ៧ គីឡូម៉ែត្រ ពីមាត់រណ្ដៅភ្នំភ្លើង។

កាលពីខែមករា ភ្នំភ្លើងនេះ បានផ្ទុះម្តងរួចមកហើយ ដោយធ្វើឱ្យអ្នកស្រុកប្រហែល៦.៥០០នាក់ ភៀសខ្លូនចេញពីលំនៅឋាន។