សភារបស់ប្រទេសអ៊ីស្រាអែល បានអនុម័តច្បាប់មួយ កាលពីថ្ងៃព្រហស្បតិ៍ ដែលអនុញ្ញាតឱ្យរដ្ឋាភិបាល បណ្តេញសាច់ញាតិរបស់អ្នកវាយប្រហារជាពលរដ្ឋប៉ាឡេស្ទីន ទៅកាន់តំបន់ហ្កាហ្សាស្ទ្រីប ឬគោលដៅផ្សេងទៀត ទោះបីជាពួកគេមានសញ្ជាតិអ៊ីស្រាអែល ក៏ដោយ។

ច្បាប់ថ្មីនេះ ផ្តល់សិទ្ធិអំណាចដល់រដ្ឋមន្ត្រីក្រសួងមហាផ្ទៃ ដើម្បីនិរទេសសមាជិកគ្រួសារនៃបុគ្គលដែលត្រូវបានចាត់ទុកដោយអាជ្ញាធរអ៊ីស្រាអែល ថា ជា «ប្រតិបត្តិករភេរវកម្ម»។

នៅក្រោមច្បាប់នេះ សាច់ញាតិទាំងអស់ អាចត្រូវបានបណ្តេញចេញពីអ៊ីស្រាអែល ទៅកាន់តំបន់ហ្កាហ្សាស្ទ្រីប ឬទីតាំងផ្សេងទៀត។

ច្បាប់នេះ អនុញ្ញាតឲ្យមានការនិរទេស ប្រសិនបើសមាជិកគ្រួសារមួយ ត្រូវបានគេរកឃើញថា បានស្គាល់ គាំទ្រ ឬជំរុញដល់សកម្មភាពភេរវកម្មដែលបានគ្រោងទុក ទោះបីជាសកម្មភាពនេះ មិនត្រូវបានអនុវត្ត ក៏ដោយ។

ច្បាប់ ដែលបានដាក់ចេញដោយសមាជិកនៃក្រុមចម្រុះស្តាំនិយមរបស់នាយករដ្ឋមន្ត្រី លោក Benjamin Netanyahu ត្រូវបានអនុម័តដោយមានការគាំទ្រពីសមាជិកសភាចំនួន៦១រូប ហើយ៤១ រូបប្រឆាំង នេះបើយោងតាមសេចក្តីថ្លែងការណ៍របស់សភា។

Adalah ជាមជ្ឈមណ្ឌលច្បាប់សម្រាប់សិទ្ធិជនជាតិភាគតិចអារ៉ាប់នៅក្នុងប្រទេសអ៊ីស្រាអែល បានថ្កោលទោសច្បាប់នេះដោយបាននិយាយថា «វានឹងពង្រឹងប្រព័ន្ធច្បាប់ពីរកម្រិតរបស់អ៊ីស្រាអែល មួយសម្រាប់ពលរដ្ឋប៉ាឡេស្ទីន និងមួយទៀតសម្រាប់ជនជាតិជ្វីហ្វអ៊ីស្រាអែល»។

ក្រុមនេះ បានបញ្ជាក់ថា ច្បាប់ នឹងបង្កើតការដាក់ទណ្ឌកម្មរួម និងបង្ហាញថា ជា «ការកើនឡើងដ៏គ្រោះថ្នាក់ ក្នុងការបង្រ្កាបរបស់អ៊ីស្រាអែលលើសិទ្ធិពលរដ្ឋប៉ាឡេស្ទីន ក្រោមការបង្ហាញថាប្រឆាំងអំពើភេរវកម្ម»។