អាហ្រ្វិកខាងត្បូង បានបិទព្រំដែនរបស់ខ្លួនជាមួយប្រទេសម៉ូហ្សំប៊ិក ភ្លាមៗបន្ទាប់ពីបានបើកដោយផ្នែកកាលពីថ្ងៃព្រហស្បតិ៍ (០៧ វិច្ឆិកា) ខណៈដែលអំពើហិង្សាក្នុងការតវ៉ាក្រោយបោះឆ្នោតនៅក្នុងប្រទេសជិតខាងមួយនេះ បានកើនឡើងខ្លាំង ដែលនាំឱ្យមានការប៉ះទង្គិចគ្នារវាងបាតុករ និងនគរបាល។

អាជ្ញាធរក៏បានព្រមានប្រជាជនអាហ្វ្រិកខាងត្បូង ឱ្យពន្យារពេលដំណើរដែលមិនសំខាន់ទៅម៉ូហ្សំប៊ិក។ អង្គការលើកលែងទោសអន្តរជាតិ បាននិយាយកាលពីថ្ងៃពុធថា មនុស្សយ៉ាងហោចណាស់ ២០នាក់ បានស្លាប់ និងរាប់រយនាក់ទៀតបានរងរបួស និងត្រូវបានចាប់ខ្លួន ចាប់តាំងពីបាតុកម្មចាប់ផ្តើមនៅចុងខែតុលា។

គួរបញ្ជាក់ថា ព្រំដែននោះត្រូវបានបិទក្នុងសប្តាហ៍នេះ ហើយផ្នែកខ្លះបានបើកនៅព្រឹកថ្ងៃព្រហស្បតិ៍ ដើម្បីអនុញ្ញាតឱ្យមានការចេញចូលនៃរថយន្តដឹកទំនិញ និងរថយន្តដែលជាប់គាំងនៅទីនោះ ប៉ុន្តែការសម្រេចនេះត្រូវបានផ្លាស់ប្តូរយ៉ាងឆាប់រហ័ស។

បាតុករនៅម៉ូហ្សំប៊ិក ដែលរៀបចំដោយមេដឹកនាំបក្សប្រឆាំង និងអ្នកគាំទ្ររបស់ពួកគេ បានជំទាស់នឹងលទ្ធផលឆ្នោតខែតុលា ដែលមើលឃើញបក្សកាន់អំណាចបន្តការគ្រប់គ្រង។ តាមសេចក្តីរាយការណ៍បានឱ្យដឹងថា នគរបាលបានប៉ះទង្គិចជាមួយក្រុមបាតុករ ដោយបាញ់ឧស្ម័នបង្ហូរទឹកភ្នែក ដើម្បីបំបែកហ្វូងមនុស្សដ៏ហិង្សានៅក្នុងរដ្ឋធានីម៉ាពុយតូ៕