កងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL) បានប្រកាសនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា កងរក្សាសន្តិភាពចំនួន ៥នាក់ បានរងរបួស នៅក្នុងការវាយប្រហារដោយយានដ្រូនរបស់អ៊ីស្រាអែល នៅទីក្រុង Sidon ភាគខាងត្បូងនៃប្រទេសលីបង់។

UNIFIL បាននិយាយនៅក្នុងសេចក្តីថ្លែងការណ៍មួយថា៖«រសៀលនេះ ក្បួនរថយន្ត UNIFIL ដឹកកងរក្សាសន្តិភាពដែលទើបមកដល់ថ្មី នៅក្នុងប្រទេសលីបង់ កំពុងឆ្លងកាត់ទីក្រុង Sidon នៅពេលដែលការវាយប្រហារដោយយានដ្រូន បានកើតឡើងនៅក្បែរវានោះ»។

UNIFIL បានបន្ថែមថា៖«កងរក្សាសន្តិភាព ៥នាក់ បានរងរបួសស្រាល ហើយត្រូវបានព្យាបាលភ្លាមៗដោយកាកបាទក្រហមលីបង់ មុនពេលបន្តដំណើរទៅកាន់ទីតាំងរបស់ពួកគេ នៅភាគខាងត្បូងប្រទេសលីបង់»។

ទន្ទឹមនឹងនេះ កងទ័ពលីបង់ បានបញ្ជាក់ថា ទាហានរបស់ខ្លួនបីនាក់ ក៏បានរងរបួសផងដែរ នៅក្នុងការវាយប្រហារដោយយានដ្រូនដូចគ្នា ដែលបានកើតឡើងនៅជិតប៉ុស្តិ៍ត្រួតពិនិត្យកងទ័ពមួយ ក្នុងទីក្រុង Sidon។

UNIFIL បាននិយាយថា៖«យើងរំលឹកភាគីទាំងអស់អំពីកាតព្វកិច្ចរបស់ពួកគេក្នុងការចៀសវាងសកម្មភាពដែលបង្កគ្រោះថ្នាក់ដល់កងរក្សាសន្តិភាព ឬជនស៊ីវិល ហើយជម្លោះ ត្រូវតែដោះស្រាយនៅតុចរចា មិនមែនតាមរយៈអំពើហិង្សាទេ»។