ប្រព័ន្ធផ្សព្វផ្សាយរដ្ឋចិន បានរាយការណ៍ថា ប្រធានាធិបតីលោក ស៊ី ជិនពីង (Xi Jinping) កាលពីថ្ងៃព្រហស្បតិ៍ (ទី៧ ខែវិច្ឆិកា) បានប្រាប់ថា ទីក្រុងប៉េកាំង និងទីក្រុងវ៉ាស៊ីនតោន ត្រូវតែស្វែងរកវិធីធ្វើយ៉ាងណា ដើម្បីឲ្យមាន «ភាពស្រុះស្រួលគ្នា» ដោយការលើកឡើងបែបនេះមាននៅក្នុងសារផ្ញើទៅកាន់ប្រធានាធិបតីជាប់ឆ្នោតរបស់សហរដ្ឋអាមេរិក គឺលោក Donald Trump។

ជ័យជម្នះដ៏ធំធេងក្នុងការប្រកួតប្រជែងតំណែងប្រធានាធិបតីរបស់លោក Trump ឈានឆ្ពោះទៅរកយុគសម័យថ្មីនៃភាពមិនប្រាកដប្រជា ទាំងនៅសហរដ្ឋអាមេរិក និងពិភពលោក ហើយបានបង្ហាញពីការដែលអាចមានភាពប្រែប្រួល នៅក្នុងទំនាក់ទំនង រវាងសហរដ្ឋអាមេរិក និងចិន ដែលត្រូវបានរង្គោះរង្គើក្នុងរយៈពេលប៉ុន្មានឆ្នាំថ្មីៗនេះ ដោយសារភាពតានតឹង ជុំវិញបញ្ហាជាច្រើន រាប់ចាប់ពីពាណិជ្ជកម្ម រហូតដល់ស្ថានភាពនៃកោះស្វ័យគ្រប់គ្រង គឺតៃវ៉ាន់។

ទូរទស្សន៍រដ្ឋ CCTV បានឲ្យដឹងថា នៅក្នុងសារដំបូងរបស់លោកផ្ញើទៅកាន់លោក Trump ចាប់តាំងពីអតីតប្រធានាធិបតីរូបនោះបានឈ្នះអាណត្តិទី២ លោក ស៊ី បានលើកឡើងថា៖ «ប្រវត្តិសាស្រ្តបានបង្ហាញថា ប្រទេសចិន និងសហរដ្ឋអាមេរិក ទទួលបានផលប្រយោជន៍ ដោយសារកិច្ចសហប្រតិបត្តិការគ្នា និងរងគ្រោះ ដោយសារការប្រឈមមុខដាក់គ្នា»។ តែប្រព័ន្ធផ្សព្វផ្សាយ CCTV មិនបានបញ្ជាក់ថា តើសារនោះត្រូវបានបញ្ជូនទៅយ៉ាងដូចម្ដេចនោះទេ។

លោក ស៊ី បានប្រាប់ថា៖ «ទំនាក់ទំនងចិន-អាមេរិកដែលមានស្ថិរភាព មានភាពល្អប្រសើរ និងនិរន្តរភាព គឺជាផលប្រយោជន៍រួមរបស់ប្រទេសទាំង២ ហើយស្របតាមការរំពឹងទុករបស់សហគមន៍អន្តរជាតិ»។ ហើយជាមួយគ្នានេះ លោកបានអំពាវនាវឲ្យទីក្រុងវ៉ាស៊ីនតោន និងទីក្រុងប៉េកាំង «ពង្រឹងការសន្ទនា និងទំនាក់ទំនង» និង «ដោះស្រាយការខ្វែងគំនិតគ្នាឲ្យបានត្រឹមត្រូវ»។ លោក ស៊ី បានសង្កត់ធ្ងន់ថា ប្រទេសទាំង២ ត្រូវតែ «ស្វែងរកវិធីដ៏ត្រឹមត្រូវ ដើម្បីឲ្យមានភាពស្រុះស្រួលគ្នា ក្នុងយុគសម័យថ្មីនេះ ដែលជាផលប្រយោជន៍នៃប្រទេសទាំង២ និងពិភពលោក»។

គួរបញ្ជាក់ថា អំឡុងពេលធ្វើយុទ្ធនាការ ទាំងលោក Trump មកពីគណបក្សសាធារណរដ្ឋ និងគូប្រជែងខាងបក្សប្រជាធិបតេយ្យរបស់លោក គឺលោកស្រី Kamala Harris បានសន្យាថា នឹងរឹតបន្តឹងលើទីក្រុងប៉េកាំង។ ប៉ុន្តែដោយឡែកលោក Trump បានបង្កើនឲ្យមានហានិភ័យកាន់តែខ្ពស់ ដោយប្តេជ្ញាថា នឹងដំឡើងពន្ធ ៦០ភាគរយ លើគ្រប់ទំនិញរបស់ចិន ដែលនាំចូលក្នុងសហរដ្ឋអាមេរិក៕