បណ្ដាមេដឹកនាំដែលកំពុងកាន់អំណាច ធ្លាប់មានប្រៀបបន្តិច នៅពេលមានការបោះឆ្នោត។ នៅសហរដ្ឋអាមេរិក អំណាចនៃការិយាល័យ Oval និងភាពអស្ចារ្យរបស់យន្តហោះ Air Force One ធ្លាប់បានធ្វើឲ្យប្រធានាធិបតីក្លាយជាបេក្ខភាពមានសិទ្ធិខ្ពស់ជាងគេ ក្នុងការឈ្នះការបោះឆ្នោតជាថ្មីម្ដងទៀត។

ដោយលោក Donald Trump មានជ័យជម្នះលើលោកស្រី Kamala Harris ប្រធានាធិបតីមកពីបក្សសាធារណរដ្ឋ និងប្រជាធិបតេយ្យ នឹងប្ដូរគ្នាគ្រប់គ្រងសេតវិមាន សម្រាប់អាណត្តិទី៤ ជាប់ៗគ្នា ជាដំណាក់កាលនៃការប្ដូរគ្នាទៅវិញទៅមក រវាងគណបក្សធំៗទាំង២ ដែលមិនធ្លាប់បានឃើញ នៅសហរដ្ឋអាមេរិក គិតចាប់តាំងពីចុងសតវត្សរ៍ទី១៩ មក។

ដូច្នេះ ការកើនឡើងនៃនិន្នាការប្រឆាំងនឹងអ្នកកំពុងតំណែង បានវាយលុកមិនត្រឹមតែនៅសហរដ្ឋអាមេរិកប៉ុណ្ណោះទេ ប៉ុន្តែថែមទាំងនៅប្រទេសប្រជាធិបតេយ្យធំៗផ្សេងទៀតផងដែរ ដោយទាំងក្រុមខាងឆ្វេងនិយម និងខាងស្ដាំនិយមបានឡើងប្រជាប្រិយភាពគួរឲ្យកត់សម្គាល់។

ជាក់ស្ដែង គណបក្សការងាររបស់ចក្រភពអង់គ្លេស បានយកឈ្នះក្នុងសំឡេងដ៏លើសលប់លើគណបក្សកាន់អំណាច គឺបក្សអភិរក្សនិយម ក្នុងខែកក្កដា បុគ្គលហៅខ្លួនឯងថា «មូលធននិយម» លោក Javier Milei បានឈ្នះការបោះឆ្នោតនៅប្រទេសអាហ្សង់ទីន ក្នុងខែវិច្ឆិកា ឆ្នាំ២០២៣ ហើយគណបក្សកាន់អំណាចយូរមកហើយជាច្រើន បានបាត់បង់ប្រជាប្រិយភាព នៅឆ្នាំ២០២៤ នេះ នៅប្រទេសជាច្រើន ដូចជាឥណ្ឌា ជប៉ុន អាហ្វ្រិកខាងត្បូង និងកូរ៉េខាងត្បូងជាដើម៕