ប្រជាជនរស់នៅក្នុងរដ្ឋធានីប្រទេសឥណ្ឌា បានព្យាយាមដើម្បីដកដង្ហើម ក្នុងពេលគុណភាពខ្យល់ស្ថិតក្នុងកម្រិតគ្រោះថ្នាក់ នៅថ្ងៃសុក្រ ទី៨ ខែវិច្ឆិកានេះ ខណៈទីក្រុង ញូវ ឌេលី(New Delhi) ត្រូវបានគ្របដណ្តប់ដោយស្រទាប់ផ្សែងអ័ព្ទក្រាស់។ 

សន្ទស្សន៍គុណភាពខ្យល់ បានបង្ហាញពីគុណភាពខ្យល់នៅក្នុងទីក្រុង ញូវ ឌេលី កំពុងស្ថិតនៅចន្លោះ «គុណភាពអាប់អួរ» ទៅ «ធ្ងន់ធ្ងរ» ដែលបង្កហានិភ័យសុខភាពដល់ពលរដ្ឋរបស់ខ្លួន ចំពោះផលប៉ះពាល់រយៈពេលយូរ។

ប្រជាជននិយាយថា ពួកគេក្រហាយភ្នែក រួមជាមួយបញ្ហាពិបាកដកដង្ហើម និងស្ទះដង្ហើម។

ទន្ទឹមនឹងនេះ អគារផ្ទះល្វែងលំនៅឋានក្នុងទីក្រុង Gurugram ដែលនៅជិតខាង បានមើលឃើញពីការចុះខ្សោយការបំពុលខ្យល់ដោយសារតែការបង្កើតភ្លៀងសិប្បនិម្មិតតាមរយៈទុយោទឹកពន្លត់អគ្គិភ័យ ខណៈបុគ្គលិក បានបាញ់សាចទឹកសម្ពាធខ្ពស់ពីដំបូលអគារ ដើម្បីកាត់បន្ថយភាគល្អិតធូលី ដែលហោះអណ្តែតលើអាកាស។

ទីក្រុង ញូវ ឌេលី ជាទីក្រុងដែលមានប្រជាជន២០លាននាក់ ជារដ្ឋធានីដែលមានការបំពុលខ្យល់បំផុតរបស់ពិភពលោក។ 

ចាប់ពីខែតុលាជារៀងរាល់ឆ្នាំ គុណភាពខ្យល់កាន់តែចុះខ្សោយទៅៗ ដោយសារកត្តាជាច្រើន រួមមានការដុតជញ្ជ្រាំងដីស្រែចម្ការបន្ទាប់ពីការប្រមូលផល ផ្សែងហុយពីរថយន្ត និងផ្សែងហុយពីការដុតផាវ ដែលហុយពាសពេញទីក្រុង។