ការព្រមានពីព្យុះរដូវរងាក្នុងខែវិច្ឆិកា ត្រូវបានចេញនៅតាមតំបន់ជាច្រើននៅរដ្ឋភាគនិរតី New Mexico សហរដ្ឋអាមេរិក ជាទីដែលព្រិលកម្រាស់ច្រើនម៉ែត្រ ត្រូវបានគេរំពឹងថានឹងធ្លាក់ចន្លោះចាប់ពីថ្ងៃព្រហស្បតិ៍ រហូតដល់ថ្ងៃសៅរ៍ ។

នៅតំបន់ភ្នំ Glorieta Mesa ស្ថិតលើរយៈកម្ពស់ ២.៧៣២ម៉ែត្រ ព្រិលបានធ្លាក់ឥតឈប់ឈរ គ្របដណ្តប់ពីលើផ្លូវកោងតាមជម្រាលភ្នំ ។

ដោយសារស្ថានភាពបើកបរប្រកបដោយគ្រោះថ្នាក់ខ្លាំង នគរបាលរដ្ឋ New Mexico បានបិទផ្លូវជាច្រើនខ្សែ រួមទាំងផ្លូវហាយវ៉េ Interstate 25 ដែលតភ្ជាប់រដ្ឋ New Mexico, Colorado និងរដ្ឋ Wyoming ។

ក្រុមពង្រឹងច្បាប់ រាយការណ៍ថា អ្នកបើកបរទោចក្រយានយន្តជាង ១០០នាក់ បានជាប់ខ្លួននៅតាមផ្លូវហាយវ៉េ 64/87 ហើយនិងមានក្តីកង្វល់ថា ព្យុះព្រិលអាចប៉ះពាល់ផងដែរដល់ផ្លូវហាយវ៉េ Interstate 40 ដែលរត់កាត់ទីក្រុង Albuquerque ។

ក្រុមហ៊ុនសេវាកម្មសាធារណៈរដ្ឋ New Mexico និយាយថា អតិថិជនជាង ៣ម៉ឺននាក់ គ្មានចរន្តអគ្គិសនីប្រើប្រាស់នៅតំបន់ភាគកណ្តាលរដ្ឋ ។

គេរំពឹងផងដែរថា ព្យុះរដូវរងា នឹងធ្វើឲ្យប៉ះពាល់ផងដែរដល់តំបន់ភាគខាងជើងរដ្ឋ New Mexico និងតំបន់ភាគខាងត្បូងរដ្ឋ Colorado ៕