ទូរទស្សន៍សាធារណៈ yle បានរាយការណ៍ថា ប្រទេសហ្វាំងឡង់ បានស្នើឲ្យអង្គការណាតូ ដាក់ពង្រាយមូលដ្ឋានយានដ្រូនឈ្លបយកការណ៍ នៅលើទឹកដីរបស់ខ្លួន ដើម្បីប្រមូលព័ត៌មាន នៅតាមព្រំដែនជាមួយប្រទេសរុស្ស៊ី។ 

យោងតាមប្រព័ន្ធផ្សព្វផ្សាយនេះបានឲ្យដឹងថា ហ្វាំងឡង់ បានផ្តល់ជូនអង្គការណាតូនូវមូលដ្ឋានមួយ សម្រាប់គោលបំណងនេះ។ កងទ័ពអាកាសហ្វាំងឡង់ មានជម្រើសចំនួន ៤ ហើយទីគ្រុង Pirkkala កំពុងត្រូវបានចាត់ទុកថា ជាទីតាំងដែលស័ក្តិសមបំផុត។ ដូចដែលសារព័ត៌មាន Iltalehti កត់សម្គាល់ថា មូលដ្ឋាននេះ ត្រូវបានគេរំពឹងថា នឹងបំពាក់ប្រព័ន្ធយានដ្រូន UAV RQ-4D ។ យានដ្រូនបែបនេះ អាចហោះហើរក្នុងរយៈកម្ពស់ ១៨ គីឡូម៉ែត្រ ហើយពួកវា ពិបាកនឹងចាប់បានណាស់។ នេះបើយោងតាមព័ត៌មាននៅលើគេហទំព័ររបស់អង្គការណាតូ។

កាសែត Iltalehti បញ្ជាក់ថា ដោយសារតែស្ថានភាពនៃប្រតិបត្តិការ មូលដ្ឋានឈ្លបយកការណ៍ ត្រូវការការការពារយោធាខ្លាំងនៅជុំវិញវា ទាំងពីការវាយប្រហារដោយប្រើអាវុធធម្មតា និងពីសង្គ្រាមអេឡិចត្រូនិក។ របាយការណ៍របស់ទូរទស្សន៍ yle បានកត់សម្គាល់ឃើញថា អង្គការណាតូ កំពុងស្ថិតក្នុងដំណាក់កាលដំបូងនៃផែនការ ហើយមិនទាន់មានកិច្ចព្រមព្រៀងនយោបាយនៅឡើយទេ ក្នុងចំណោមប្រទេសទាំងអស់ ការសម្រេចចិត្ត មិនត្រូវបានរំពឹងទុកមុនឆ្នាំ ២០២៥។ មូលដ្ឋានយានដ្រូនឈ្លបយកការណ៍បច្ចុប្បន្ន គឺមាននៅប្រទេសអ៊ីតាលី។