ការិយាល័យសិទ្ធិមនុស្សរបស់អង្គការសហប្រជាជាតិ (UN) នៅថ្ងៃសុក្រ (ទី៨ ខែវិច្ឆិកា) បានប្រាប់ឲ្យដឹងថា ជិត ៧០ភាគរយនៃអ្នកស្លាប់ដែលខ្លួនបានផ្ទៀងផ្ទាត់ ក្នុងសង្រ្គាម នៅតំបន់ហ្កាហ្សា គឺជាស្ត្រី និងកុមារ ហើយបានថ្កោលទោសនូវអ្វីដែលហៅថា ការរំលោភជាប្រព័ន្ធលើគោលការណ៍ជាមូលដ្ឋាននៃច្បាប់មនុស្សធម៌អន្តរជាតិ។

ការសរុបចំនួនអ្នកស្លាប់របស់ UN នេះ ក្ដោបលើរយៈពេល ៧ខែដំបូងនៃជម្លោះអ៊ីស្រាអែល និងក្រុមហាម៉ាស នៅតំបន់ហ្កាហ្សាស្ទ្រីប ដែលបានចាប់ផ្តើមផ្ទុះឡើងជាងមួយឆ្នាំមុន។

យ៉ាងណាក្ដី ជនរងគ្រោះចំនួន ៨.១១៩នាក់ ដែលត្រូវបានផ្ទៀងផ្ទាត់ដោយការិយាល័យសិទ្ធិមនុស្សរបស់ UN ក្នុងរយៈពេល ៧ខែនោះ គឺទាបជាងយ៉ាងច្រើនពីចំនួនអ្នកស្លាប់ ៤៣.០០០នាក់ ដែលផ្តល់ដោយអាជ្ញាធរសុខាភិបាលប៉ាឡេស្ទីន សម្រាប់រយៈពេល ១៣ខែពេញនៃជម្លោះនេះ។

ប៉ុន្តែការបែងចែករបស់ UN ពាក់ព័ន្ធនឹងអាយុ និងភេទរបស់ជនរងគ្រោះ គាំទ្រដល់ការអះអាងរបស់ប៉ាឡេស្ទីន ដែលថា ស្ត្រី និងកុមារ បានបាត់បង់ជីវិតច្រើនជាងគេ ក្នុងសង្គ្រាមនេះ។

នៅក្នុងសេចក្តីថ្លែងការណ៍មួយអមដោយរបាយការណ៍ដែលមាន ៣២ទំព័រ ការិយាល័យសិទ្ធិមនុស្សរបស់ UN បានឲ្យដឹងថា ការរកឃើញនេះ បង្ហាញពី «ការរំលោភជាប្រព័ន្ធលើគោលការណ៍ជាមូលដ្ឋាននៃច្បាប់មនុស្សធម៌អន្តរជាតិ ដែលក្នុងនោះរួមទាំងភាពខុសគ្នា (រវាងយោធា និងស៊ីវិល) និងសមាមាត្រ (ថ្លឹងថ្លែងពីសកម្មភាពយោធា)»។

អ៊ីស្រាអែលមិនបានធ្វើអត្ថាធិប្បាយអ្វីភ្លាមៗនោះឡើយលើការរកឃើញរបស់របាយការណ៍នេះ៕