បណ្ដាក្រុមហ៊ុននានា បាន និងកំពុងផ្លាស់ទីតាំងរោងចក្រពីប្រទេសចិនទៅកាន់តំបន់អាស៊ីអាគ្នេយ៍ ដោយរំពឹងថា លោក Donald Trump នឹងដំឡើងពន្ធយ៉ាងខ្ពស់លើទីក្រុងប៉េកាំង ប្រសិនបើលោកបានគ្រប់គ្រងសេតវិមានម្ដងទៀត ជាចំណាត់ការមួយ ដែលនឹងត្រូវពន្លឿន ក្រោយជ័យជម្នះរបស់លោក ក្នុងការបោះឆ្នោត។ នេះបើយោងតាមសម្ដីពីអ្នកនៅក្នុងក្រុមហ៊ុនអភិវឌ្ឍន៍សួនឧស្សាហកម្ម ក្នុងតំបន់។

លោក Trump ដែលបានទទួលជ័យជម្នះយ៉ាងលើសលប់ កាលពីថ្ងៃអង្គារ (ទី៧ ខែវិច្ឆិកា) បានគំរាមកំហែងដំឡើងពន្ធ ៦០ភាគរយ លើទំនិញនាំចូលសហរដ្ឋអាមេរិកមកពីប្រទេសចិន ពោលគឺខ្ពស់ជាងកម្រិត ៧,៧ភាគរយ ទៅ ២៥ភាគរយ ដែលលោកបានយកនៅក្នុងអាណត្តិទី១ របស់លោក ដែលជាហានិភ័យដ៏ធំ សម្រាប់ប្រទេសសេដ្ឋកិច្ចធំបំផុតជាងគេទី២ របស់ពិភពលោក។

នាយកប្រតិបត្តិ ២នាក់ អ្នកធុរកិច្ច ២ក្រុម មេធាវីម្នាក់ និងអ្នកវិភាគមួយរូប ក្នុងតំបន់ បាននិយាយថា តំបន់អាស៊ីអាគ្នេយ៍ ដោយមានរោងចក្រផលិតរថយន្ត និងអេឡិចត្រូនិក រាប់ចាប់ពីប្រទេសថៃ រហូតទៅដល់វៀតណាម និងម៉ាឡេស៊ី ទំនងជានឹងទទួលបានផលពីការខាតបង់របស់ប្រទេសចិននេះ។

ក្រុមហ៊ុនអភិវឌ្ឍន៍សួនឧស្សាហកម្ម កំពុងបន្ថែមអ្នកនិយាយភាសាចិន និងរៀបចំប្លង់ដី សម្រាប់រោងចក្រទាំងនោះ ដោយនេះជាសញ្ញាបង្ហាញឲ្យឃើញថា តើលោក Trump ដែលត្រូវចូលកាន់តំណែងក្នុងខែមករា អាចរុះរើខ្សែច្រវាក់ផ្គត់ផ្គង់សកលយ៉ាងដូចម្ដេច៕