​​អ៊ីរ៉ង់​៖ សមាជិក​សភា​អ៊ីរ៉ង់​ម្នាក់​បាន​និយាយ​កាលពី​ថ្ងៃអាទិត្យ​ បន្ទាប់ពី​ជំនួប​ជាមួយ​រដ្ឋមន្ត្រី​ការបរទេស​លោក Hossein Amir-Abdollahian ថា ប្រទេស​អ៊ីរ៉ង់​នឹង​បន្ត​ការចរចា​នុយក្លេអ៊ែរ​ជាមួយ​មហាអំណាច​ពិភពលោក​នៅ​ថ្ងៃ​ព្រហស្បតិ៍​ ទី​២១ ខែ​តុលា​សប្ដាហ៍​នេះ​ដែល​ត្រូវ​បាន​ផ្អាក​កាលពី​ខែ​មិថុនា​។

​លោក Ahmad Alirezabeigui បាន​ប្រាប់​ទីភ្នាក់ងារសារព័ត៌មាន Fars បន្ទាប់ពី​កិច្ចប្រជុំ​បិទទ្វារ​ជាមួយ​លោក Amir-Abdollahian ថា កិច្ចពិភាក្សា​ជាមួយ​ក្រុម​ប្រទេស ៤+១ នឹង​ចាប់ផ្ដើម​ឡើងវិញ​នៅ​ថ្ងៃ​ព្រហស្បតិ៍​នៅ​ទីក្រុង​ព្រុ​ច​សែ​ល​។​ ​សមាជិកសភា​រូបនេះ​សំដៅលើ​សមាជិក​អចិន្ត្រៃយ៍​ក្រុមប្រឹក្សាសន្តិសុខ​អង្គការសហប្រជាជាតិ​ចំនួន ៥ គឺ​អង់គ្លេស ចិន បារាំង និង​រុស្ស៊ី រួមជាមួយ​អាល្លឺម៉ង់​។ ​ប្រទេស​អ៊ីរ៉ង់​ និង​ប្រទេស​ទាំង ៥ នេះ​បាន​បើក​កិច្ចចរចា​នៅ​ទីក្រុង​វី​យែ​នប្រទេសអូទ្រីសកាលពី​ខែមេសា​ ដោយមាន​ការចូលរួម​ពី​សហភាព​អឺរ៉ុប (EU)​ ផងដែរ ខណៈ​សហរដ្ឋអាមេរិក​បាន​ចូលរួម​ក្នុង​ការចរចា​ដោយ​ប្រយោល​។​

​សហរដ្ឋអាមេរិក ចិន រុស្ស៊ី អាល្លឺម៉ង់ បារាំង និង​អង់គ្លេសបាន​ចុះ​កិច្ចព្រមព្រៀង​នៅ​ទីក្រុង​វី​យែ​ន​ជាមួយ​ប្រទេស​អ៊ីរ៉ង់ ​ស្តីពី​កម្មវិធី​នុយ​ក្លេ​អ៊ែរ​របស់ខ្លួន​ក្នុង​ឆ្នាំ២០១៥។ ​កិច្ចពិភាក្សា​ក្រុង​វី​យែ​ន​ដែលមាន​គោលបំណង​ស្រោចស្រង់​កិច្ចព្រមព្រៀង​ឡើងវិញ ត្រូវបាន​ផ្អាក​កាលពី​ខែមិថុនា​នៅពេលដែល​អ៊ីរ៉ង់​បានជ្រើសរើស​លោក Ebrahim Raisi ​ជា​ប្រធានាធិបតី​៕

អត្ថបទ៖ សុខមាន