វិមានក្រឹមឡាំង និយាយនៅថ្ងៃសុក្រនេះថា ប្រធានាធិបតីរុស្ស៊ីលោក Vladimir Putin បានត្រៀមខ្លួនរួចរាល់ក្នុងការពិភាក្សាលើបញ្ហាសង្រ្គាមអ៊ុយក្រែនជាមួយលោក Donald Trumpដែលជាប្រធានាធិបតិជាប់ឆ្នោតរបស់សហរដ្ឋអាមេរិក ប៉ុន្តែវាមិនមែនមានន័យថា លោក Putinចង់ផ្លាស់ប្តូរការទាមទាររបស់លោក ហើយគោលដៅរបស់រុស្ស៊ី មិនផ្លាស់ប្តូរនោះទេ ។

កាលពីថ្ងៃព្រហស្បតិ៍លោក Putin បានអបអរសាទរលោក Donald Trump សម្រាប់ការឈ្នះឆ្នោតរបស់លោក កោតសរសើរលោកសម្រាប់ការបង្ហាញសេចក្តីក្លាហានពេលខ្មាន់កាំភ្លើងប៉ុនប៉ងធ្វើឃាត លោក ហើយលោក Putinនិយាយថា ទីក្រុងម៉ូស្គូ បានត្រៀមខ្លួនរួចរាល់សម្រាប់កិច្ចសន្ទនាជាមួយប្រធានាធិបតីជាប់ឆ្នោតមកពីគណបក្សសាធារណរដ្ឋរូបនេះ ។

នៅពេលសួរពីលទ្ធភាពនៃការជជែកគ្នាតាមទូរស័ព្ទរវាងលោក Trump និងលោក Putin អ្នកនាំពាក្យវិមានក្រឹមឡាំងលោក Dmitry Peskovនិយាយថា ពុំទាន់មានអ្វីច្បាស់លាស់ត្រូវរាយការណ៍ពីបញ្ហាមួយនេះនោះទេ ហើយវាហាក់ដូចជាឆាប់រហ័សពេកហើយក្នុងការនិយាយពីការរីកចម្រើនណាមួយនៃទំនាក់ទំនងរវាងរុស្ស៊ី និងសហរដ្ឋអាមេរិក ។

លោកបន្តថា ប៉ុន្តែលោក Putinបាននិយាយយ៉ាងច្បាស់ច្រើនលើកមកហើយថា លោកបើកទ្វារស្វាគមន៍កិច្ចសន្ទនាគ្នា ៕