រដ្ឋអាជ្ញាសហរដ្ឋអាមេរិក កាលពីថ្ងៃសុក្រ បានប្រកាសការចោទប្រកាន់ជាច្រើនករណី ក្នុងការប៉ុនប៉ងរបស់អ៊ីរ៉ង់ ដើម្បីធ្វើឃាតអតីតប្រធានាធិបតី Donald Trump និងអ្នកសារព័ត៌មានអាមេរិកដើមកំណើតអ៊ីរ៉ង់ ជាអ្នកប្រឆាំងដ៏លេចធ្លោម្នាក់។

ក្រសួងយុត្តិធម៌ បាននិយាយថា ផែនការធ្វើឃាតមិនបានសម្រេច លើលោក Trump ត្រូវបានចោទប្រកាន់ថា ដឹកនាំដោយកងឆ្មាំបដិវត្តន៍ឥស្លាមរបស់អ៊ីរ៉ង់ ដើម្បីសងសឹកចំពោះការស្លាប់របស់ឧត្តមសេនីយ៍អ៊ីរ៉ង់ម្នាក់ លោក កាសេម សូឡេម៉ានី(Qassem Soleimani) ដែលត្រូវបានសម្លាប់ក្នុងឆ្នាំ ២០២០ ក្នុងការវាយប្រហាររបស់សហរដ្ឋអាមេរិកដែលបញ្ជាដោយប្រធានាធិបតី លោក Trump កាលពីពេលនោះ។

ក្រសួង បាននិយាយនៅក្នុងសេចក្តីថ្លែងការណ៍ថា លោក Farhad Shakeri អាយុ៥១ឆ្នាំ ជាជនជាតិអាហ្វហ្គានីស្ថាន ជាអ្នកដែលត្រូវបានគេជឿថា ស្ថិតនៅក្នុងប្រទេសអ៊ីរ៉ង់ ត្រូវបាន «ប្រគល់ភារកិច្ច» ដោយកងឆ្មាំបដិវត្តន៍ឥស្លាមរបស់អ៊ីរ៉ង់(IRGC) ដោយការផ្តល់ផែនការសម្លាប់លោក Trump ជាអ្នកដែលបានធ្វើឲ្យអនុប្រធានាធិបតី លោកស្រី Kamala Harris បរាជ័យក្នុងការបោះឆ្នោតប្រធានាធិបតីសហរដ្ឋអាមេរិក កាលពីថ្ងៃអង្គារ សប្តាហ៍នេះ។

លោក Shakeri និងបុរសពីរនាក់ផ្សេងទៀត លោក Carlisle Rivera អាយុ៤៩ឆ្នាំ និងលោក Jonathon Loadholt អាយុ៣៦ឆ្នាំ ទាំងពីរនាក់រស់នៅទីក្រុង New York ត្រូវបានចោទប្រកាន់ដាច់ដោយឡែកពីគ្នា ពីបទរៀបចំផែនការសម្លាប់អ្នកប្រឆាំងជនជាតិអ៊ីរ៉ង់-អាមេរិកម្នាក់ នៅទីក្រុងញូវយ៉ក។

នាយក FBI លោក Christopher Wray បាននិយាយថា «ការចោទប្រកាន់ដែលបានប្រកាសនៅថ្ងៃនេះ បង្ហាញឱ្យឃើញពីការប៉ុនប៉ងដ៏អាក្រក់ដែលនៅតែបន្តរបស់អ៊ីរ៉ង់ ដើម្បីកំណត់គោលដៅលើពលរដ្ឋអាមេរិក រួមទាំងប្រធានាធិបតីជាប់ឆ្នោតថ្មី លោកDonald Trump មេដឹកនាំរដ្ឋាភិបាលផ្សេងៗទៀត និងអ្នកប្រឆាំងដែលរិះគន់របបនៅក្នុងទីក្រុងតេអេរ៉ង់។