មន្ត្រីរដ្ឋបាលជាន់ខ្ពស់មួយរូប កាលថ្ងៃសុក្រ (ទី៨ ខែវិច្ឆិកា) បានប្រាប់សារព័ត៌មាន Reuters ថា សហរដ្ឋអាមេរិកបានប្រាប់ប្រទេសកាតាថា វត្តមានរបស់ក្រុមហាម៉ាសនៅក្នុងទីក្រុងដូហា គឺមិនអាចទទួលយកបានទៀតទេ នៅក្នុងសប្តាហ៍នេះ ដោយសារក្រុមសកម្មប្រយុទ្ធប៉ាឡេស្ទីនមួយនេះ បានបដិសេធសំណើចុងក្រោយ ដើម្បីសម្រេចបានបទឈប់បាញ់ និងកិច្ចព្រមព្រៀងដោះលែងចំណាប់ថ្នូរ។

រដ្ឋឈូងសមុទ្រដ៏តូច គឺកាតា រួមជាមួយនឹងសហរដ្ឋអាមេរិក និងអេហ្ស៊ីប បានដើរតួនាទីយ៉ាងសំខាន់ នៅក្នុងកិច្ចចរចាជាច្រើនជុំដែលរហូតមកដល់ពេលនេះមិនទទួលបានផ្លែផ្កាអ្វីឡើយ ដើម្បីធ្វើយ៉ាងណាឲ្យបានឈានដល់បទឈប់បាញ់ សម្រាប់សង្គ្រាមដែលអូសបន្លាយមួយឆ្នាំ នៅតំបន់ហ្កាហ្សា។ ជុំចុងក្រោយនៃកិច្ចចរចា នាពាក់កណ្តាលខែតុលា បានបរាជ័យក្នុងការបង្កើតបាននូវកិច្ចព្រមព្រៀងមួយ ដោយក្រុមហាម៉ាសបានច្រានចោលសំណើបទឈប់បាញ់រយៈពេលខ្លី។

ដោយសុំនិយាយក្នុងលក្ខខណ្ឌមិនបញ្ចេញឈ្មោះ មន្ត្រីជាន់ខ្ពស់រូបនេះបានប្រាប់ថា៖ «បន្ទាប់ពីបដិសេធសំណើម្តងហើយម្តងទៀត ក្នុងការដោះលែងចំណាប់ថ្នូរ មេដឹកនាំរបស់ក្រុមនេះមិនគួរត្រូវបានស្វាគមន៍នៅក្នុងរដ្ឋធានីនៃប្រទេសដៃគូអាមេរិកណាមួយទៀតឡើយ។ យើងបានធ្វើការបញ្ជាក់យ៉ាងច្បាស់លាស់បែបនោះទៅកាន់ប្រទេសកាតា បន្ទាប់ពីមានការបដិសេធ កាលពីប៉ុន្មានសប្ដាហ៍កន្លងទៅ ចំពោះសំណើដោះលែងចំណាប់ថ្នូរមួយផ្សេងទៀត»។

មន្ត្រីរូបនេះបាននិយាយថា បន្ទាប់មក ប្រទេសកាតាបានធ្វើការទាមទារនេះ ទៅកាន់ប្រមុខដឹកនាំក្រុមហាម៉ាសប្រមាណជា ១០ ថ្ងៃមុន។ ទីក្រុងវ៉ាស៊ីនតោនបានទាក់ទងជាមួយប្រទេសកាតាអំពីពេលវេលាដែលត្រូវបិទការិយាល័យនយោបាយរបស់ក្រុមនេះ ហើយខ្លួនបានប្រាប់ទីក្រុងដូហាថា ឥឡូវនេះដល់ពេលហើយ។

តែយ៉ាងណាក្ដី មន្ត្រីក្រុមហាម៉ាស ៣រូប បានបដិសេធថា កាតាមិនបានប្រាប់ប្រមុខដឹកនាំក្រុមហាម៉ាសពាក់ព័ន្ធនឹងថា ពួកគេលែងត្រូវបានស្វាគមន៍ នៅក្នុងប្រទេសនេះទៀតហើយ។ ចំណែកអ្នកនាំពាក្យក្រសួងការបរទេសកាតាមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕