អ៊ីតាលី៖ នគរបាលបានប្រើកាណុងបាញ់ទឹក និងឧស្ម័នបង្ហូរទឹកភ្នែកដើម្បីបំបែកក្រុមបាតុករនៅទីក្រុងកំពង់ផែទ្រីស្តេ (Trieste) ភាគពាយ័ព្យនៃប្រទេសអ៊ីតាលី បន្ទាប់ពីមនុស្សរាប់រយនាក់បានអង្គុយតវ៉ាចំពោះតម្រូវការប័ណ្ណបញ្ជាក់ស្ថានភាពសុខភាពនៃវីរុស COVID-19 នៅកន្លែងធ្វើការ។
ប្រទេសអ៊ីតាលីបានក្លាយជាប្រទេសសេដ្ឋកិច្ចនៅអឺរ៉ុបដំបូងគេ ដែលទាមទារឱ្យបុគ្គលិកទាំងអស់ចាប់ពីជាងកាត់សក់ ធ្វើសក់ រហូតដល់កម្មកររោងចក្រដើម្បីបង្ហាញភស្តុតាងនៃការចាក់វ៉ាក់សាំង ការធ្វើតេស្តអវិជ្ជមានក្នុងរយៈពេល ៤៨ម៉ោងចុងក្រោយ ឬភស្តុតាងថ្មីនៃការជាសះស្បើយពីជំងឺកូវីដ-១៩ ដើម្បីចូលធ្វើការ។ ការតវ៉ាបានផ្ទុះឡើងនៅពេលដែលវិធានការតឹងរ៉ឹងបានចូលជាធរមាន។ នគរបាលបានបណ្តេញចេញក្រុមបាតុកររាប់រយនាក់ បន្ទាប់ពីការតវ៉ាជាច្រើនម៉ោងកាលពីថ្ងៃចន្ទដោយប្រើកាណុងបាញ់ទឹក ហើយក្រោយមកបានបាញ់ឧស្ម័នបង្ហូរទឹកភ្នែកទៅលើហ្វូងមនុស្ស។
រដ្ឋាភិបាលនិយាយថា វិធានការនេះគឺចាំបាច់ដើម្បីធានាបានថា កន្លែងធ្វើការមានសុវត្ថិភាព ដូច្នេះសេដ្ឋកិច្ចប្រទេសអ៊ីតាលីដែលធ្លាក់ចុះ ៨,៩% កាលពីឆ្នាំមុនអាចងើបឡើងវិញ។ ទោះយ៉ាងណាក្រុមប្រឆាំងនិយាយថា តម្រូវការនេះគឺមិនស្របតាមរដ្ឋធម្មនុញ្ញ រំលោភសិទ្ធិរបស់ពួកគេ ដាក់បន្ទុកមិនយុត្តិធម៌ដល់កម្មករ និងនិយោជក និងមិនសមាមាត្រទៅនឹងតម្រូវការ។ រហូតមកដល់ពេលនេះប្រទេសអ៊ីតាលីមានករណីឆ្លងវីរុស COVID-19 សរុប ៤,៧១៩,៤៩៣ករណី និងមានអ្នកស្លាប់ ១៣១,៥៦៥នាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
