​បាល់ទាត់៖ ​ក្រុមបាល់ទាត់​ជំរើសជាតិ​អង់គ្លេស​នឹងត្រូវ​លេង​ ១​ប្រកួត​ក្នុង​កីឡដ្ឋាន​ទទេរគ្មាន​អ្នកគាំទ្រ​ទស្សនា ​ដែលជា​ការផាកពិន័យរ​បស់ UEFA ជុំវិញ​ទង្វើ​អ​សណ្ដាប់ធ្នាប់​របស់​អ្នកគាំទ្រ​អំឡុង​ការប្រកួត​វគ្គ​ផ្តាច់ព្រ័ត្រ Euro ២០២០ នៅ​កីឡដ្ឋាន Wembley​។

​​UEFA ថែមទាំង​ពិន័យ FA អង់គ្លេស​ជា​ទឹកប្រាក់ ១០ម៉ឺន​អឺរ៉ូ​ផងដែរ​ចំពោះ​កង្វះ​ការរៀបចំ បណ្តាលឱ្យមាន​ភាព​រញ៉េរញ៉ៃ​ខ្វះ​សណ្តាប់ធ្នាប់​ទាំង​ក្នុង និង​ក្រៅ​កីឡដ្ឋាន​។​ ​នេះ​ជា​លើកដំបូង​ដែល FA អង់គ្លេស​ទទួល​ការពិន័យ​ពី UEFA បែបនេះ​។ ​រំលឹកថា ​កាលពី​ថ្ងៃទី១១ ខែកក្កដា​កន្លងទៅ​នៃ​វគ្គ​ផ្តាច់ព្រ័ត្រ Euro ២០២០ រវាង​អង់គ្លេស និង​អ៊ីតាលី​នៅ​កីឡដ្ឋាន Wembley អ្នកគាំទ្រ​បាន​សម្រុកចូល​កីឡដ្ឋាន និង​បាន​ប៉ះទង្គិច​គ្នា​ជាមួយ​កងសន្តិសុខ ក៏ដូចជា​មន្ត្រីនគរបាល​ធ្វើយ៉ាងណា​ទ​ម្លោះ​ចូល​កីឡដ្ឋាន​ឱ្យបាន​។

​​ជា​លទ្ធផល​ត្រូវបាន​គេ​ដឹងថា ​មាន​អ្នកគាំទ្រ​ប្រមាណ​ជាង ១០០នាក់​ចូលក្នុង​កីឡដ្ឋាន​បានសំរេច​ដោយ​មិន​ទិញ​សំបុត្រ​។ ​​ក៏មាន​ការរត់​ជាន់គ្នា​ផងដែរ​នៅពេលនោះ ហើយ​ក្នុងចំណោម​មនុស្ស​ដែល​រងរបួស​ដោយសារ​រត់​ជាន់គ្នា​នោះ​ ក៏មាន​ឪពុក​របស់​ខ្សែការពារ Manchester United, Harry Maguire ផងដែរ​។ ​​មនុស្ស​ចំនួន ៥១នាក់​ត្រូវបាន​ឃាត់ខ្លួន​ផងដែរ ​អំឡុង​ថ្ងៃ​ប្រកួត​ផ្តាច់ព្រ័ត្រ​ដែល​ក្នុងនោះ​មាន ២៦នាក់​ឃាត់ខ្លួន​នៅក្នុង​កីឡដ្ឋាន Wembley៕

​អត្ថបទ​៖​នាង សុភា​វុ​ធ