ប្រទេសហៃទី នឹងដាក់ឈ្មោះសហគ្រិន និងជាអតីតបេក្ខជនព្រឹទ្ធសភា លោក អាឡិច ឌីឌៀ ហ្វីអេមើ (Alix Didier Fils-Aime) ដើម្បីជំនួសនាយករដ្ឋមន្ត្រីបច្ចុប្បន្ន លោក ហ្ការី កូនីល (Garry Conille) ដែលត្រូវបានជ្រើសរើសសម្រាប់តួនាទីនេះកាលពីខែឧសភា នេះបើយោងតាមពង្រាងសេចក្តីសម្រេចរបស់ក្រុមប្រឹក្សាអន្តរកាលប្រធានាធិបតី ដែលមើលឃើញដោយសារព័ត៌មានរ៉យទ័រ។

ការរុះរើនេះគឺជាការវាយប្រហារចុងក្រោយបំផុតដល់ស្ថិរភាពនយោបាយក្នុងប្រទេសដែលកំពុងតែមានអំពើហិង្សាកាន់តែខ្លាំងឡើងរួចទៅហើយ។ ក្រុមជនអន្ធពាលប្រដាប់អាវុធបានទទួលការគ្រប់គ្រងលើផ្នែកភាគច្រើននៃរដ្ឋធានីព័រអូប្រាំង ហើយបានពង្រីកទៅតំបន់ក្បែរៗនោះ ដោយបានបង្កឱ្យមានភាពអត់ឃ្លាន និងបង្ខំមនុស្សរាប់សែននាក់ចេញពីផ្ទះសម្បែងរបស់ពួកគេ។

ការសន្យាគាំទ្រពីអន្តរជាតិនៅតែយឺតយ៉ាវ ហើយប្រទេសជិតខាងបាននិរទេសជនភៀសខ្លួនហៃទី ត្រឡប់ទៅប្រទេសវិញ។ សេចក្តីសម្រេចចុះថ្ងៃចន្ទ (១១ វិច្ឆិកា) ត្រូវបានគេរំពឹងថានឹងចេញផ្សាយក្នុងកាសែតផ្លូវការរបស់រដ្ឋាភិបាល។

លោក Conille ដែលធ្លាប់បានដឹកនាំប្រទេសរយៈពេលខ្លីជាងមួយទសវត្សរ៍មុននោះ បានធ្វើជានាយករដ្ឋមន្ត្រីប្រហែល ៦ខែ។ លោកត្រូវបានតែងតាំងឱ្យកាន់តួនាទីនេះនៅក្នុងខែឧសភា ដោយក្រុមប្រឹក្សាអន្តរកាលហៃទី ខណៈប្រទេសសមុទ្រការ៉ាអ៊ីបមួយនេះកំពុងប្រឹងប្រែងដើម្បីស្ដារស្ថិរភាពឡើងវិញ៕