អាជ្ញាធរប្រទេសគុយបា បាននិយាយថា ពួកគេនឹងមិនអត់ឱនចំពោះ «ភាពគ្មានសណ្តាប់ធ្នាប់សាធារណៈ»ឡើយ ខណៈបុគ្គលិកសង្គ្រោះបន្ទាន់របស់កោះនេះ បានសម្អាតកម្ទេចកម្ទី និងធ្វើការដើម្បីស្តារថាមពលអគ្គិសនីឡើងវិញដល់ផ្នែកមួយចំនួននៅភាគខាងលិចប្រទេសគុយបា ដែលនៅតែស្ថិតក្នុងភាពងងឹតរយៈពេល៤ថ្ងៃ បន្ទាប់ពីការឆ្លងកាត់នៃព្យុះសង្ឃរា Rafael ។

ព្យុះសង្ឃរា Rafael បានបំផ្លាញខ្សែបញ្ជូន និងបង្គោលអគ្គិសនីរាប់រយនៅទូទាំងភាគខាងលិចប្រទេសគុយបា ដោយបានកាត់ផ្តាច់ថាមពលអគ្គិសនីដល់ប្រទេសទាំងមូលដែលមានប្រជាជនចំនួន១០លាននាក់ និងបង្កឱ្យមានការតវ៉ាជាច្រើន។

រដ្ឋអាជ្ញាជាន់ខ្ពស់របស់ប្រទេសគុយបា បាននិយាយថា ខ្លួនបានដាក់ការចោទប្រកាន់ និងឃាត់ខ្លួនមនុស្សជាការទប់ស្កាត់ នៅក្នុងទីក្រុងឡាហាវ៉ាន និងនៅទីក្រុងមួយចំនួនទៀត ពីបទ «រំលោភបំពាន ភាពគ្មានសណ្តាប់ធ្នាប់សាធារណៈ និងការបំផ្លិចបំផ្លាញ»។

រដ្ឋអាជ្ញា បាននិយាយនៅក្នុងសេចក្តីថ្លែងការណ៍ថា សកម្មភាពដែលបានធ្វើឡើងនៅក្នុងដែនដីកោះនេះ គឺត្រូវស្តារសេវាកម្មឡើងវិញ ដែលត្រូវតែអមដោយបរិយាកាសនៃសណ្តាប់ធ្នាប់ វិន័យ និងការគោរពចំពោះអាជ្ញាធរ។

ប្រតិបត្តិករបណ្តាញអគ្គិសនីរបស់ប្រទេសគុយបា បាននិយាយថា ៨៥% នៃរដ្ឋធានីឡាហាវ៉ាន បានមើលឃើញថាមពលអគ្គិសនីត្រូវបានស្តារឡើងវិញ កាលពីព្រឹកថ្ងៃអាទិត្យ។ ប៉ុន្តែអ្នកស្រុកមួយចំនួន នៅលើបណ្តាញផ្សព្វផ្សាយសង្គម បានរាយការណ៍ថា មានការផ្ទុះការតវ៉ាប្រឆាំងការដាច់ចរន្តអគ្គិសនី ដែលនៅតែបន្ត។