សន្និសីទប្រចាំឆ្នាំរបស់អង្គការសហប្រជាជាតិ ស្តីពីបម្រែបម្រួលអាកាសធាតុ បើកនៅរដ្ឋធានី Baku របស់ប្រទេសអាស៊ែបៃហ្សង់ នៅថ្ងៃចន្ទនេះ ក្នុងពេលមានភាពមិនច្បាស់លាស់ជុំវិញកិច្ចសហប្រតិបត្តិការរបស់សហរដ្ឋអាមេរិក បន្ទាប់ពីជ័យជម្នះរបស់លោក Donald Trump ក្នុងការបោះឆ្នោតប្រធានាធិបតី កាលពីសប្តាហ៍មុន។

គណៈប្រតិភូមកពីប្រទេស និងដែនដីជាង១៩០ ត្រូវបានគេរំពឹងថានឹងចូលរួមក្នុងកិច្ចប្រជុំដែលគេស្គាល់ថា COP29។ សន្និសីទនេះ គ្រោងនឹងបន្តរហូតដល់ថ្ងៃទី២២ ខែវិច្ឆិកា។ ប្រធានបទសំខាន់មួយនៅលើរបៀបវារៈគឺ ថាតើប្រទេសអភិវឌ្ឍនឹងផ្តល់មូលនិធិប៉ុន្មានដល់ប្រទេសកំពុងអភិវឌ្ឍន៍ជារៀងរាល់ឆ្នាំ ចាប់ពីឆ្នាំ២០២៥ ដើម្បីជួយដោះស្រាយបម្រែបម្រួលអាកាសធាតុ។

អ្នកចូលរួមក៏ត្រូវបានគេរំពឹងថានឹងពិភាក្សាអំពីគោលដៅកាត់បន្ថយការបញ្ចេញឧស្ម័នផ្ទះកញ្ចក់ថ្មីសម្រាប់ឆ្នាំ២០៣៥។ ប្រទេសនានា ត្រូវបានតម្រូវឱ្យដាក់ផែនការរបស់ពួកគេទៅកាន់អង្គការសហប្រជាជាតិនៅត្រឹមខែកុម្ភៈ ខាងមុខ។ មេដឹកនាំមកពីប្រទេស និងដែនដីប្រហែល១០០ នឹងចូលរួមកិច្ចប្រជុំកម្រិតកំពូល ដែលគ្រោងនឹងចាប់ផ្តើមនៅថ្ងៃអង្គារ។ មេដឹកនាំ ទំនងជានឹងរួមមានទាំងប្រធានាធិបតីអ៊ុយក្រែន លោក Volodymyr Zelenskyy និងនាយករដ្ឋមន្ត្រីរុស្ស៊ី លោក Mikhail Mishustin ។

វានៅតែមិនទាន់ច្បាស់នោះទេ ថាតើសហរដ្ឋអាមេរិក ដែលជាប្រទេសបញ្ចេញឧស្ម័នកម្តៅភពផែនដីធំជាងគេទីពីរ នឹងបន្តធ្វើការជាមួយប្រទេសផ្សេងទៀតដើម្បីដោះស្រាយបម្រែបម្រួលអាកាសធាតុ ឬយ៉ាងណា។ ប្រធានាធិបតីជាប់ឆ្នោតថ្មី លោក ដូណាល់ ត្រាំ ត្រូវបានគេជឿថា មានផែនការដកប្រទេសរបស់លោក ចេញពីកិច្ចព្រមព្រៀងទីក្រុងប៉ារីសឆ្នាំ២០១៥។