គណៈកម្មការអន្តរក្រសួង កំពុងពិនិត្យ និងធ្វើបច្ចុប្បន្នភាពទីតាំងដីរដ្ឋ ក្នុងការដោះស្រាយ​នូវ​បញ្ហា​ប្រឈម​នានា​លើការចុះបញ្ជីដីរបស់រដ្ឋ ជាពិសេសការធ្វើវិញ្ញាបនបត្រសម្គាល់ម្ចាស់អចលនវត្ថុ និង​ការ​កត់ត្រាដីរដ្ឋចុះនៅក្នុងបញ្ជីសារពើភណ្ឌទ្រព្យសម្បត្តិរដ្ឋ។

ក្នុងសិក្ខាសាលាស្តីពី បច្ចុប្បន្នភាពទីតាំងដីរដ្ឋ ការរៀបចំវិញ្ញាបនបត្រសម្គាល់ម្ចាស់អចលនវត្ថុ និង​ការ​ចុះ​បញ្ជីសារពើភណ្ឌទ្រព្យសម្បត្តិរដ្ឋ នៅថ្ងៃទី១១ ខែវិច្ឆិកា ឆ្នាំ២០២៤ ឯកឧត្តមបណ្ឌិត ឈន សុភាព រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង​ជា​សហ​ប្រធាន​គណៈកម្មការ​អន្តរ​ក្រសួង​ ដើម្បីពិនិត្យ និងធ្វើបច្ចុប្បន្នភាពទីតាំងដីរដ្ឋ មានប្រសាសន៍ថា ទីតាំងដីរដ្ឋមួយចំនួន ពុំទាន់​អាច​កំណត់អង្គភាពកាន់កាប់ច្បាស់លាស់នៅឡើយ ដែលជា​កត្តា​ពុំអា​ច​ដាក់​​ពាក្យ​ស្នើ​សុំ​ធ្វើ​ប័ណ្ណ​កម្ម​សិទ្ធិបាន ហើយថ្មីៗនេះ ក៏រកឃើញនូវបញ្ហាប្រឈមនេះ ក្នុងក្របខ័ណ្ឌ នៃការផ្ទេរ​មុខងា​រ​ដល់​រដ្ឋបាល ក្រុង-ស្រុក រួមមានការផ្ទេរទ្រព្យសម្បត្តិរដ្ឋ នៃការិយាល័យអប់រំស្រុក និង​ការិយាល័យ​សុខាភិបាលស្រុក ។

ឯកឧត្តមបានបន្តថា ទីតាំងដីរដ្ឋមួយចំនួន មិនមានឯកសារគាំទ្រគ្រប់គ្រាន់ សម្រាប់​ដាក់​ពាក្យ​ស្នើ​សុំ​ធ្វើ​ប័ណ្ណកម្មសិទ្ធិ ដោយបញ្ហានេះ ចំពោះអង្គភាពដែលជួបប្រទះ អាចលើកឡើង ហើយ​អន្តរ​ក្រសួង នឹងស្នើទៅក្រសួងរៀបចំដែនដី នគរូបនីយកម្ម និងសំណង់ ពិនិត្យ និងផ្ដល់យោបល់​ករណី​ជាក់​ស្ដែងនីមួយៗ ដើម្បីឲ្យអង្គភាពអាចរៀបចំឯកសារគាំទ្រ ដាក់នូវពាក្យធ្វើប័ណ្ណកម្មសិទ្ធិ ។

លោក ណុំ ស៊ីនិត អគ្គនាយករង នៃអគ្គនាយករដ្ឋានទ្រព្យសម្បត្តិរដ្ឋ និងចំណូលមិន​មែន​សារ​ពើ​ពន្ធ​បានឲ្យដឹងថា សម្រាប់សិក្ខាសាលានេះ ធ្វើឡើងក្នុងគោលបំណង ពិនិត្យវឌ្ឍនភាព និងបញ្ហា​ប្រឈម​ នៃការគ្រប់គ្រងទ្រព្យសម្បត្តិរដ្ឋជារួម ជាពិសេសការ​ធ្វើ​វិញ្ញា​បនបត្រ​សម្គាល់​ម្ចាស់​អចលន​វត្ថុ​លើ​ដីរដ្ឋ និងការកត់ត្រាដីរដ្ឋក្នុងបញ្ជីសារពើភណ្ឌទ្រព្យសម្បត្តិរដ្ឋ, ផ្សព្វផ្សាយអំពី​ក្រប​ខ័ណ្ឌ​គតិយុត្ត​ថ្មីៗ ពាក់ព័ន្ធលក្ខខណ្ឌ និងនីតិវិធីនៃការចុះបញ្ជីដីរដ្ឋ និងការគ្រប់គ្រង​ប្រើប្រាស់​ទ្រព្យ​សម្បត្តិ​រដ្ឋ និងពិភាក្សាលើវិធានការ និងជំហានការងារបន្ទាប់ ដើម្បីជំរុញបញ្ចប់​ការ​ធ្វើ​ប័ណ្ណ​កម្ម​សិទ្ធិ​ដីរដ្ឋ និងការពង្រឹងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ឱ្យកាន់ តែល្អប្រសើរ​ថែម​ទៀត​។

សូមបញ្ជាក់ថា រាជរដ្ឋាភិបាលបាននិងកំពុងពង្រឹងជាបន្តបន្ទាប់ លើការគ្រប់គ្រងទ្រព្យសម្បត្តិរដ្ឋ ដើម្បី​ធានាឱ្យការគ្រប់គ្រង និងការប្រើប្រាស់ទ្រព្យទាំងឡាយរបស់រដ្ឋ ប្រកបដោយប្រសិទ្ធភាព ស័ក្ដិ​សិទ្ធភាព តម្លាភាព និងគណនេយ្យភាព ។ ក្នុងនោះ រាជរដ្ឋាភិបាល​បានដា​ក់​ឱ្យអ​នុវត្ត​ច្បាប់​ស្ដីពី​ការ​គ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ និងលិខិតបទដ្ឋានផ្សេងទៀត ដើម្បី​ព​ង្រឹងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ឱ្យកាន់តែមានប្រសិទ្ធភាព និង​បាន​ដាក់​ឱ្យ​អនុវត្តអនុក្រឹត្យស្ដីពីលក្ខខណ្ឌ និងនីតិវិធីនៃការចុះបញ្ជីដីរដ្ឋ ដើម្បីធានាការពារ​បន្ថែម​ទៀត​នូវ​កម្ម​សិទ្ធិ និងសិទ្ធិផ្សេងទៀតលើដីរបស់រដ្ឋ ហើយយន្តការគ្រប់គ្រង និងសម្របសម្រួលនានា ក៏​ត្រូវ​បាន​រាជរដ្ឋាភិបាលបង្កើតឡើង៕ អត្ថបទ៖ បាន សុខរិទ្ធិ