នៅតាមដងផ្លូវនៃទីក្រុងដ៏ធំទីពីរ ឡាហ័រ (Lahore) របស់ប៉ាគីស្ថាន កង្វក់ខ្យល់ដ៏អាក្រក់ដែលកំពុងបន្ត បានធ្វើឱ្យអ្នកស្រុកខឹងសម្បារ ខណៈបញ្ហាសុខភាពក៏បានលេចឡើង ដូចជាធ្វើឱ្យភ្នែកក្រហម និងរលាកបំពង់ក ជាដើម។ នៅតាមលំនៅឋាននានា មានមនុស្សតិចណាស់ដែលមានលទ្ធភាពទិញម៉ាស៊ីនបន្សុទ្ធខ្យល់ ដើម្បីកាត់បន្ថយផលប៉ះពាល់ពីភាគល្អិតបំពុលរបស់ខ្យល់ដែលជ្រាបចូលតាមទ្វារ និងបង្អួច។

ទីក្រុង ឡាហ័រ ដែលមានប្រជាជន1១៤លាននាក់ និងពោរពេញដោយរោងចក្រ ជាប់ចំណាត់ថ្នាក់ជាទីក្រុងដែលមានកង្វក់បរិយាកាស ឬការបំពុលខ្លាំងបំផុតរបស់ពិភពលោក ប៉ុន្តែបញ្ហាដ៏អាក្រក់នេះបានឈានដល់កម្រិតខ្ពស់ខ្លាំងក្នុងកំណត់ត្រានៅក្នុងខែវិច្ឆិកា។

សាលារៀននានាបានបិទទ្វារនៅក្នុងទីក្រុងសំខាន់ៗនៃខេត្ត ផុនចាប (Punjab) —ដែលទីក្រុងឡាហ័រជារដ្ឋធានី— រហូតដល់ថ្ងៃទី១៧ ខែវិច្ឆិកា ក្នុងគោលបំណងកាត់បន្ថយការប៉ះពាល់របស់កុមារទៅនឹងកង្វក់ខ្យល់ ជាពិសេសក្នុងអំឡុងពេលធ្វើដំណើរពេលព្រឹក នៅពេលការបំពុលមានកម្រិតខ្ពស់បំផុត។

យោងតាមសន្ទស្សន៍គុណភាពខ្យល់អន្តរជាតិ (AQI) បានឱ្យដឹងថា តម្លៃសន្ទស្សន៍គុណភាពខ្យល់ ៣០០ ឬខ្ពស់ជាងនេះគឺ "ជាកម្រិតគ្រោះថ្នាក់" ដល់សុខភាព ហើយប៉ាគីស្ថាន បានស្ថិតលើកម្រិតជាង ១.០០០។

នៅទីក្រុង ម៉ូលតាន (Multan) មួយផ្សេងទៀតដែលមានមនុស្សរាប់លាននាក់ នៅចម្ងាយប្រហែល ៣៥០គីឡូម៉ែត្រ កម្រិតគុណភាពខ្យល់ AQI បានឡើងលើស ២.០០០ កាលពីសប្តាហ៍មុន ដែលជាកម្រិតដ៏គួរឱ្យភ្ញាក់ផ្អើលមួយមិនធ្លាប់មានពីមុនមក៕