បណ្តាញគ្រូពេទ្យស៊ូដង់ ជាអង្គការមិនមែនរដ្ឋាភិបាល បានរាយការណ៍ថា មនុស្សយ៉ាងហោចណាស់១១នាក់បានស្លាប់ និង១៨នាក់ផ្សេងទៀតបានរងរបួសកាលពីថ្ងៃអាទិត្យនៅក្នុងការវាយប្រហារដោយកងកម្លាំងគាំទ្ររហ័សយោធាប៉ារ៉ា (RSF) នៅភូមិ Al Hodur ក្នុងរដ្ឋ Gezira ភាគកណ្តាលប្រទេសស៊ូដង់។

យោងតាមបណ្តាញគ្រូពេទ្យ បានឲ្យដឹងថា កងកម្លាំងគាំទ្ររហស័យោធាប៉ារ៉ា(RSF) បានលួចចូលមណ្ឌលសុខភាពភូមិ និងនៅតាមលំនៅឋានផងដែរ។ សេចក្តីថ្លែងការណ៍ បាននិយាយបន្ថែមថា ក្នុងចំណោមអ្នករងគ្រោះ រួមមានទាំងកុមារ។

សកម្មជនក្នុងតំបន់ និងក្រុមអ្នកស្ម័គ្រចិត្ត បានចោទប្រកាន់កងកម្លាំងគាំទ្ររហ័សយោធាប៉ារ៉ា(RSF) ថាបានបើកការវាយប្រហារនៅទូទាំងរដ្ឋ Gezira ភាគខាងកើត បន្ទាប់ពីការចុះចាញ់របស់មេបញ្ជាការតំបន់របស់ខ្លួន លោក Abu Aqla Keikel ចំពោះកងកម្លាំងប្រដាប់អាវុធស៊ូដង់ (SAF) កាលពីថ្ងៃទី២០ ខែតុលា។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បានរាយការណ៍ ថាមនុស្សប្រហែល ១៣៥.៤០០នាក់ បានភៀសខ្លួនចេញពីទីលំនៅ នៅទូទាំងរដ្ឋ Gezira ចាប់តាំងពីថ្ងៃទី២០ ខែតុលា ដោយសារតែការកើនឡើងនៃអំពើហិង្សានៅក្នុងភូមិ និងទីក្រុងជាង៣០។