ក្រសួងការពារជាតិរបស់ប្រទេសស៊ីរី បានរាយការណ៍ថា ជនស៊ីវិល ៧នាក់ ក្នុងនោះមានស្ត្រី និងកុមារ ត្រូវបានសម្លាប់ និង ២០ នាក់ផ្សេងទៀត រងរបួស នៅក្នុងការវាយប្រហារតាមអាកាសរបស់អ៊ីស្រាអែល នៅជិតរដ្ឋធានីដាម៉ាសរបស់ប្រទេសស៊ីរី កាលពីល្ងាចថ្ងៃអាទិត្យ។

ក្រសួងបានឲ្យដឹងក្នុងសេចក្តីថ្លែងការណ៍មួយថា នៅម៉ោងប្រហែល ៥ល្ងាច ម៉ោងក្នុងស្រុក (ម៉ោង ១៤:00 ម៉ោងសកល) អ៊ីស្រាអែលដែលជាសត្រូវ បានបើកការវាយប្រហារតាមអាកាសពីតំបន់ខ្ពង់រាប Golan Heights ដោយផ្តោតលើអគារលំនៅឋានមួយ នៅក្នុងតំបន់ Sayyidah Zaynab ក្នុងតំបន់ជនបទនៃទីក្រុងដាម៉ាស។

សេចក្តីថ្លែងការណ៍នោះ បានបន្ថែមថា ការវាយប្រហារនេះ ក៏បានបង្កការខូចខាតយ៉ាងធ្ងន់ធ្ងរដល់ទ្រព្យសម្បត្តិឯកជនផងដែរ។

ក្រុមឃ្លាំមើលសិទ្ធិមនុស្សស៊ីរី ជាអ្នកឃ្លាំមើលសង្រ្គាមដែលមានមូលដ្ឋាននៅចក្រភពអង់គ្លេស បានរាយការណ៍ថា ការវាយប្រហារនោះ បានត្រូវចំផ្ទះល្វែងមួយ នៅក្នុងអគារលំនៅដ្ឋានមួយ ដែលមានប្រជាជន   លីបង់ និងសមាជិកក្រុមហេសបូឡា នៅក្នុងនោះ។