សមាគមនិយោជកដែនសមុទ្រ (MEA) និងសហជីព កាលពីថ្ងៃអាទិត្យ (ទី១០ ខែវិច្ឆិកា) បាននិយាយថា សហជីពរបស់កម្មករកំពង់ផែ នៅទីក្រុង Montreal របស់ប្រទេសកាណាដា បានច្រានចោលការស្នើជូនចុងក្រោយ ដែលធ្វើឡើង ដើម្បីផ្ដល់កិច្ចសន្យាការងារថ្មី ដោយការបដិសេធនេះនាំឲ្យការបិទទ្វារមិនឲ្យចូលធ្វើការត្រូវបានប្រកាសឡើង។

MEA បានឲ្យដឹងនៅក្នុងសេចក្តីថ្លែងការណ៍មួយថា ការបិទមិនឲ្យចូលធ្វើការដែលនឹងប៉ះពាល់ដល់កម្មករផែជិត ១.២០០នាក់ នៅកំពង់ផែរបស់កាណាដា ដែលបានជួយលើកដាក់ទំនិញ ៨,៧លានតោន ក្នុងត្រីមាសទី៣ នៃឆ្នាំ២០២៤ ត្រូវបានប្រកាសគិតត្រឹមម៉ោង ៩យប់ ម៉ោងនៅលោកខាងកើត (ត្រូវនឹងម៉ោង ២ ម៉ោងសកល)។

ការបិទទ្វារមិនឲ្យចូលធ្វើការនេះ នឹងធ្វើឲ្យយឺតបន្ថែមទៀតដល់ការនាំចូល និងការនាំចេញរបស់កាណាដា ខណៈដែលកំពង់ផែ Montreal បានដំណើរការដោយផ្នែកៗ និងខណៈដែលកំពង់ផែ West Coast ត្រូវបានបញ្ឈប់ ដោយសារតែជម្លោះដាច់ដោយឡែកមួយផ្សេងទៀត។

សហជីពដែលតំណាងឲ្យកម្មករផែ នៅកំពង់ផែ Montreal បាននិយាយថា ការស្នើជូននេះត្រូវបានច្រានចោលដោយសមាជិក ៩៩,៧ភាគរយ ដោយសារតែនិយោជកបដិសេធមិនព្រមចរចា៕