ក្រសួងសុខាភិបាលហ្កាហ្សា បាននិយាយថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែលលើតំបន់ហ្កាហ្សា ចាប់តាំងពីការចាប់ផ្តើមនៃការកើនឡើងនាពេលបច្ចុប្បន្ននៃជម្លោះប៉ាឡេស្ទីន-អ៊ីស្រាអែលនៅដើមខែតុលា ឆ្នាំ ២០២៣ បានកើនឡើងលើសពី ៤៣.៦០០នាក់ ជាមួយនឹងមនុស្សជិត ១០៣.000 នាក់ បានរងរបួស។

យោងតាមក្រសួងបានឲ្យដឹងថា មនុស្សចំនួន ៤៣.៦០៣នាក់ ត្រូវបានសម្លាប់ ក្នុងនោះមាន ៥១នាក់ ក្នុងរយៈពេល ២៤ម៉ោងកន្លងទៅ។ ជនស៊ីវិល ១៦៤នាក់ បានរងរបួស ក្នុងអំឡុងមួយថ្ងៃកន្លងទៅ ដែលនាំឲ្យចំនួនអ្នករបួសសរុប កើនដល់ ១០២.៩២៩នាក់។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ា កាលពីថ្ងៃទី ៧ ខែតុលា បន្ទាប់ពីក្រុមសកម្មប្រយុទ្ធមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានបើកការលុកលុយដ៏គួរឲ្យភ្ញាក់ផ្អើលមួយនៅលើទឹកដីអ៊ីស្រាអែល ដោយបានសម្លាប់អ្នកស្រុកជនជាតិអ៊ីស្រាអែលជាច្រើននាក់ដែលរស់នៅក្បែរព្រំដែនហ្កាហ្សា និងចាប់ពង្រត់ជនជាតិអ៊ីស្រាអែលជាង ២៤០នាក់ ក្នុងនោះមានស្ត្រី កុមារ និងមនុស្សចាស់។ អ៊ីស្រាអែល បានប្រកាសបិទផ្លូវទាំងស្រុងនៃតំបន់ហ្កាហ្សាស្ទ្រីប និងបានបើកការវាយប្រហារលើដែនដីនេះ និងតំបន់មួយចំនួនក្នុងប្រទេសលីបង់ និងស៊ីរី ព្រមទាំងប្រតិបត្តិការជើងគោក ប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប។ ការប៉ះទង្គិចគ្នា ក៏ត្រូវបានរាយការណ៍ផងដែរ នៅក្នុង តំបន់វេសបែង។