អ្នករត់ចោលស្រុកកូរ៉េខាងជើងមួយក្រុម បានប្រគល់ខិតប័ណ្ណឃោសនាដល់ប្រទេសអ៊ុយក្រែន នៅថ្ងៃចន្ទ នេះ ដោយលើកទឹកចិត្តឲ្យទាហានកូរ៉េខាងជើងដែលដាក់ពង្រាយនៅក្នុងប្រទេសរុស្ស៊ី ឲ្យរត់ចោលស្រុក   ខណៈដែលកងទ័ពកូរ៉េខាងជើងរាប់ពាន់នាក់ ត្រូវបានបញ្ជូនទៅគាំទ្រសង្គ្រាមរបស់រុស្ស៊ីប្រឆាំងនឹងអ៊ុយក្រែន។

ក្រុមនេះ បាននិយាយថា អង្គភាពឃោសនាការរបស់អ្នករត់ចោលស្រុកដែលរួមមានទាហានកូរ៉េខាងជើង ប្រែក្លាយអ្នករត់ចោលស្រុក និងអ្នករត់ចោលជួរ ដែលកូនប្រុសបម្រើការក្នុងជួរកងទ័ពកូរ៉េខាងជើង បានប្រគល់ខិតប័ណ្ណឃោសនា ទៅស្ថានទូតអ៊ុយក្រែន នៅទីក្រុងសេអ៊ូល ដើម្បីចែកចាយដល់ទាហានកូរ៉េខាងជើង នៅក្នុងប្រទេសរុស្ស៊ី។  

ខិត្តប័ណ្ណមានសារលើកទឹកចិត្តទាហានកូរ៉េខាងជើង ឲ្យរត់ចោលជួរ រួមជាមួយនឹងការណែនាំអំពីរបៀបរត់ចោលជួរផងដែរ។ ឯកសារសំឡេងជាច្រើនដែលមានសារស្រដៀងគ្នា ក៏ត្រូវបានបញ្ជូនទៅស្ថានទូតផង  ដែរ។

មេដឹកនាំក្រុមលោក Jang Se-yul គ្រោងនឹងប្រគល់ខិតប័ណ្ណស្រដៀងគ្នានេះ ទៅឲ្យមន្ត្រីយោធាអ៊ុយក្រែន នៅទីក្រុងប្រ៊ុចសែល ប្រទេសបែលហ្ស៊ិក នៅថ្ងៃបន្ទាប់ (ម៉ោងក្នុងតំបន់) រួមជាមួយនឹងលិខិតស្នើដល់ ប្រធានាធិបតីអ៊ុយក្រែនលោក វ៉្លូឌីមី ហ្សេឡិនស្គី (Volodymyr Zelenskyy) ឲ្យប្រើសង្រ្គាមចិត្តសាស្ត្រប្រឆាំងនឹងទាហានកូរ៉េខាងជើង។ 

នៅក្នុងលិខិតនោះ លោក Jang នឹងសង្កត់ធ្ងន់ថា៖«យោធាអ៊ុយក្រែន អាចធានាបាននូវការចុះចាញ់ និងការរត់ចោលជួរ ក្នុងចំណោមទាហានកូរ៉េខាងជើង ប្រសិនបើសង្គ្រាមចិត្តសាស្ត្រសកម្ម ត្រូវបានបង្កើតឡើងនោះ» ។

សហរដ្ឋអាមេរិក បានបញ្ជាក់ថា ទាហានកូរ៉េខាងជើងប្រមាណ ១0.000នាក់ ត្រូវបានបញ្ជូនទៅកាន់ តំបន់ព្រំដែនភាគខាងលិចនៃតំបន់ឃើស( Kursk) របស់រុស្ស៊ី ជាមួយនឹងលទ្ធភាពនៃការចូលរួមក្នុងការប្រយុទ្ធប្រឆាំងនឹងកងកម្លាំងអ៊ុយក្រែន។