អ៊ីស្រាអែល បាននិយាយកាលពីថ្ងៃចន្ទថា ខ្លួនបានបំពេញតាមការទាមទារភាគច្រើនរបស់សហរដ្ឋអាមេរិក ដើម្បីធ្វើឲ្យប្រសើរឡើងស្ថានភាពមនុស្សធម៌នៅក្នុងតំបន់ហ្កាហ្សា ប៉ុន្តែនៅតែពិភាក្សាអំពីចំណុចមួយចំនួន ខណៈពេលវេលាកំណត់ជិតឈានចូលមកដល់ដើម្បីធ្វើឲ្យប្រសើរឡើងស្ថានភាពនៅទីនោះ បើមិនដូច្នេះទេនឹងត្រូវប្រឈមមុខទៅនឹងការរឹតត្បិតខ្លាំងលើជំនួយយោធារបស់សហរដ្ឋអាមេរិក ដែលត្រូវផ្តល់ទៅឲ្យអ៊ីស្រាអែល។

មន្ត្រីអ៊ីស្រាអែលម្នាក់ បានប្រាប់អ្នកសារព័ត៌មានថា នៅមានរឿងរ៉ាវមួយចំនួនដែលនឹងត្រូវពិភាក្សា ហើយវាប៉ះពាល់ដល់បញ្ហាសុវត្ថិភាព។ លោកនិយាយថា បញ្ហាភាគច្រើន ត្រូវបានដោះស្រាយរួចហើយ។ ក្នុងចំណោមការទាមទាររបស់សហរដ្ឋអាមេរិក ដែលអ៊ីស្រាអែល ទំនងជាត្រូវបដិសេធ គឺការអនុញ្ញាតឱ្យមានរថយន្តដឹកទំនិញពី៥០ទៅ១០០គ្រឿង ក្នុងមួយថ្ងៃ។

មន្ត្រីរូបនេះ បាននិយាយថា សកម្មភាពពាណិជ្ជកម្ម ត្រូវបានបញ្ឈប់ ព្រោះថាក្រុមហាម៉ាស កំពុងគ្រប់គ្រងក្រុមពាណិជ្ជករ។ ការរឹតបន្តឹង លើការចូលនៃរថយន្តដឹកទំនិញដែលត្រូវបានបិទ ក៏នឹងមិនត្រូវបានដកចេញដែរ ដោយសារតែហានិភ័យសុវត្ថិភាព។

សហរដ្ឋអាមេរិក បានប្រាប់អ៊ីស្រាអែលដែលជាសម្ព័ន្ធមិត្តរបស់ខ្លួននៅក្នុងលិខិតមួយច្បាប់ កាលពីថ្ងៃទី១៣ ខែតុលាថា អ៊ីស្រាអែល ត្រូវតែមានចំណាត់ការដើម្បីធ្វើឲ្យប្រសើរឡើងស្ថានភាពផ្តល់ជំនួយក្នុងរយៈពេល ៣០ថ្ងៃ ដោយនៅថ្ងៃអង្គារនេះ ជាថ្ងៃផុតកំណត់ចុងក្រោយ។

កាលពីសប្តាហ៍មុន ក្រសួងការបរទេសបាននិយាយថា អ៊ីស្រាអែល បានចាត់វិធានការមួយចំនួន ដើម្បីបង្កើនការផ្តល់ជំនួយទៅកាន់តំបន់ហ្កាហ្សា ប៉ុន្តែរហូតមកដល់ពេលនេះ បានបរាជ័យយ៉ាងខ្លាំងក្នុងការកែប្រែស្ថានភាពមនុស្សធម៌ នៅទីនោះ។