ក្រុមបាតុកររាប់ពាន់នាក់ បានមកប្រមូលផ្តុំគ្នានៅមុខអគាររដ្ឋាភិបាលប្រទេសស៊ែប៊ី កាលពីថ្ងៃចន្ទ ដោយទាមទារឱ្យចាប់ខ្លួនអ្នកទទួលខុសត្រូវចំពោះឧបទ្ទវហេតុនៅស្ថានីយ៍រថភ្លើងនៅភាគខាងជើងទីក្រុង Novi Sad បណ្តាលមនុស្ស ១៤ នាក់ស្លាប់។

ទោះបីជាមានភ្លៀងធ្លាក់ និងជាថ្ងៃបុណ្យជាតិក៏ដោយ សកម្មជនគណបក្សប្រឆាំងបានបង្ហាញការខកចិត្តរបស់ពួកគេ ដែលគ្មាននរណាម្នាក់ត្រូវបានឃុំខ្លួន ឬកាត់ទោស ជាអ្វីដែលពួកគេនិយាយថា ជាការធ្វេសប្រហែស និងអំពើពុករលួយរបស់អាជ្ញាធរ។

មហន្តរាយកាលពីថ្ងៃទី ១ ខែវិច្ឆិកា នៅទីក្រុង Novi Sad ចម្ងាយប្រហែល៧០ គីឡូម៉ែត្រ ភាគពាយព្យ ទីក្រុង Belgrade បានកើតឡើងនៅពេលដែលដំបូលនៅច្រកចូលស្ថានីយ៍រថភ្លើង បានបាក់រលំភ្លាមៗ បណ្តាលឲ្យមនុស្ស១៤នាក់ស្លាប់ និងរងរបួសធ្ងន់៣នាក់។

នៅក្រោមផែនការដំបូង ក្រុមអ្នកតវ៉ា ត្រូវបានគេសន្មត់ថាដាក់ការទាមទាររបស់ពួកគេ សម្រាប់ការលាលែងពីតំណែងរបស់នាយករដ្ឋមន្ត្រី លោក Milos Vucevic និងអភិបាលក្រុង Novi Sad លោក Milan Djuric ទៅកាន់ប្រធានាធិបតី លោក Aleksandar Vucic ។

ប៉ុន្តែវិមានប្រធានាធិបតី ត្រូវបាននគរបាលរារាំង ដោយបានដាក់នគរបាលព័ទ្ធជុំវិញ ដូច្នេះពួកគេបាននិយាយថា នឹងបង្វែរការទាមទារ រួមទាំងការផ្សព្វផ្សាយកិច្ចសន្យាសម្ងាត់ស្តីពីការកសាងស្ថានីយ៍រថភ្លើងឡើងវិញ ទៅកាន់សភា។

ក្រុមអ្នកតវ៉ា និយាយថា ដ៏រ៉ាបណាការទាមទាររបស់ពួកគេមិនត្រូវបានបំពេញ សមាជិកសភាគណបក្សប្រឆាំង នឹងអំពាវនាវឱ្យសភាបោះឆ្នោតដកសេចក្តីទុកចិត្ត ក្នុងរដ្ឋាភិបាល។