បណ្តាប្រទេសមូស្លីម បានថ្កោលទោសការវាយប្រហារដ៏ «បង្ហូរឈាម» របស់អ៊ីស្រាអែល នៅតំបន់ហ្កាហ្សាស្ទ្រីប និងនៅប្រទេសលីបង់ និងបានអំពាវនាវជាថ្មីឱ្យមានបទឈប់បាញ់បន្ទាន់ ព្រមទាំងការដឹកជញ្ជូនជំនួយមនុស្សធម៌ចូលទៅកាន់តំបន់នោះ។

មេដឹកនាំមកពីតំបន់មជ្ឈិមបូព៌ា អាហ្រ្វិក អាស៊ី និងកន្លែងផ្សេងទៀត បានមកចូលរួមក្នុងកិច្ចប្រជុំកំពូលនៃអង្គការសហប្រតិបត្តិការឥស្លាម ឬ OIC នៅរដ្ឋធានីរីយ៉ាដ ប្រទេសអារ៉ាប៊ីសាអូឌីត កាលពីថ្ងៃចន្ទ។

បណ្តាមេដឹកនាំ បានអនុម័តសេចក្តីសម្រេច ស្តីពីស្ថានភាពនៅតំបន់ហ្កាហ្សា និងនៅប្រទេសលីបង់ ក្នុងពេលមានវិបត្តិមនុស្សធម៌កាន់តែខ្លាំង ដោយសារតែការវាយប្រហាររបស់អ៊ីស្រាអែល។

រជ្ជទាយាទរបស់ប្រទេសអារ៉ាប៊ីសាអូឌីត ព្រះអង្គម្ចាស់ Mohammed bin Salman បានថ្លែងនៅពេលចាប់ផ្តើមកិច្ចប្រជុំកំពូលថា ប្រទេសរបស់ទ្រង់បន្ត «ការថ្កោលទោស និងបដិសេធដាច់ខាតចំពោះអំពើប្រល័យពូជសាសន៍ ដែលប្រព្រឹត្តដោយអ៊ីស្រាអែល» ប្រឆាំងពលរដ្ឋប៉ាឡេស្ទីន។

ព្រះអង្គ ក៏បានថ្កោលទោសប្រតិបត្តិការយោធារបស់អ៊ីស្រាអែល ដែលផ្តោតលើទឹកដីលីបង់ និងបានថ្លែងថា អារ៉ាប៊ីសាអូឌីត ច្រានចោលការគំរាមកំហែងដល់សន្តិសុខ និងស្ថិរភាពរបស់ប្រទេសលីបង់។ ប្រទេសទាំងអស់ ដែលចូលរួម បានបញ្ជាក់ថា នឹងបង្កើនសម្ពាធទៅលើប្រទេសអ៊ីស្រាអែល។