សម្រាប់ប្រទេសផលិតទង់ដែងខ្នាតយក្សរបស់អាមេរិកខាងត្បូង ប៉េរូ ប្រធានាធិបតីជាប់ឆ្នោតថ្មីរបស់សហរដ្ឋអាមេរិក លោក Donald Trump នឹងមើលឃើញខ្លួនឯងនៅលើទីតាំងរាជ័យរួចទៅហើយនៅក្នុងសង្រ្គាមពាណិជ្ជកម្មជាមួយប្រទេសចិន ដែលជាផ្នែកមួយនៃការពង្រឹងអំណាចឡើងវិញដ៏ធំនៅជុំវិញតំបន់សម្បូរធនធានក្នុងទីធ្លាខាងក្រោយរបស់ទីក្រុងវ៉ាស៊ីនតោន។

ប្រទេសប៉េរូ ដែលជាប់លេខ២ក្នុងពិភពលោកសម្រាប់ការនាំចេញទង់ដែង គ្រោងធ្វើជាម្ចាស់ផ្ទះមេដឹកនាំនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ក្នុងសប្តាហ៍នេះ ជាមួយនឹងប្រធានាធិបតីចិន លោក Xi Jinping រំពឹងថានឹងចូលរួម ហើយនិងសម្ពោធកំពង់ផែថ្មីដ៏សំខាន់ដែលសាងសង់ដោយចិន នៅប៉េរូ។ ប្រធានាធិបតីអាមេរិកបច្ចុប្បន្ន លោក Joe Biden ដែលជិតផុតអាណត្តិ ក៏ស្ថិតក្នុងបញ្ជីភ្ញៀវកិត្តិយសផងដែរ។

ប៉េរូបានឆ្លុះបញ្ចាំងពីបញ្ហាប្រឈមកាន់តែទូលំទូលាយសម្រាប់សេតវិមាននៅជុំវិញអាមេរិកខាងត្បូង ដែលវត្តមានរបស់ប្រទេសចិនបានរីកចម្រើនយ៉ាងឆាប់រហ័ស ដោយសារការនាំចេញសំខាន់ៗដ៏ធំរបស់ខ្លួនក្នុងតំបន់ រួមមានពោត ទង់ដែង សណ្តែកសៀង សាច់គោ និងអាគុយលោហធាតុលីចូមជាដើម។

នោះហើយបានធ្វើឱ្យទីក្រុងប៉េកាំង ក្លាយជាដៃគូពាណិជ្ជកម្មរាប់ចាប់ពីប្រេស៊ីល ទៅកាន់ឈីលី និងអាហ្សង់ទីន ដោយលុបបំបាត់ឥទ្ធិពលនយោបាយក្នុងតំបន់របស់ទីក្រុងវ៉ាស៊ីនតោន ហើយនេះជានិន្នាការមួយដែលបានពង្រីកកាន់តែខ្លាំងនៅក្រោមការដឹកនាំ "យកអាមេរិកជាធំ" របស់ Trump ក្នុងអំឡុងពេលរដ្ឋបាលដំបូងរបស់ខ្លួន និងជាថ្មីម្តងទៀតនៅក្រោមរដ្ឋបាលលោក Biden៕