អ្នកនាំពាក្យរបស់ក្រុមនេះ បាននិយាយកាលពីថ្ងៃចន្ទថា ក្រុមហេសបូឡា មិនបានទទួលសំណើណាមួយស្តីពីបទឈប់បាញ់សម្រាប់ប្រទេសលីបង់នោះទេ។  

លោក Mohammed Afif ដែលជាមន្ត្រីទំនាក់ទំនងប្រព័ន្ធផ្សព្វផ្សាយម្នាក់ បានថ្លែងនៅក្នុងសន្និសីទសារព័ត៌មានមួយ ស្របពេលមានគំនរបាក់បែកនៃអគារ នៅភាគខាងត្បូងទីក្រុងបេរូត (Beirut) បន្ទាប់ពីការវាយប្រហារតាមអាកាសរយៈពេល ៤៥ថ្ងៃ។ 

លោកបាននិយាយថា៖«រហូតមកដល់ពេលនេះ មិនមានសំណើផ្លូវការ ឬជាក់លាក់ណាមួយ បានទៅដល់ប្រទេសលីបង់ ឬពួកយើង ទាក់ទងនឹងដំណោះស្រាយ ដែលយើងឮគេនិយាយនោះទេ»។

យើងបានឮអំពីចលនានយោបាយដ៏សំខាន់មួយ ដែលទាក់ទងគ្នារវាងទីក្រុងតេអេរ៉ង់ ទីក្រុងវ៉ាស៊ីនតោន និងមូស្គូ ប៉ុន្តែខ្ញុំមិនរំពឹងថា នឹងមានអ្វីជាក់លាក់ ក្នុងពេលឆាប់ៗនេះទេ»។

លោក Afif បាននិយាយថា ទំនាក់ទំនងរបស់ក្រុមហេសបូឡា ជាមួយកងទ័ពលីបង់គឺ «រឹងមាំ និងយូរអង្វែង ហើយនឹងនៅដដែល។ យើងសូមកោតសរសើរចំពោះតួនាទីរបស់កងទ័ព ក្នុងការការពារទឹកដី និងសន្តិសុខជាតិ»។

ការអត្ថាធិប្បាយរបស់លោក បានកើតឡើង បន្ទាប់ពីអគ្គលេខាធិការរបស់ក្រុមហេសបូឡា លោក Naim Qassem កាលពីសប្តាហ៍មុន បានចោទសួរពីតួនាទីរបស់យោធា ក្នុងការប្រឈមមុខនឹងការរំលោភដែនទឹករបស់កងកុម្ម៉ង់ដូអ៊ីស្រាអែល និងការចាប់ជំរិតប្រធានក្រុមនាវាពីទីក្រុងឆ្នេរសមុទ្រ Batroun នៃប្រទេសលីបង់។