ក្រុមហ៊ុនអាកាសចរណ៍យក្ស Boeing ដែលរងការរិះគន់ បានឈានដល់ការដោះស្រាយចុងក្រោយ នៅថ្ងៃទី១១ ខែវិច្ឆិកាជាមួយគ្រួសាររបស់ស្ត្រី ដែលបានបាត់បង់ជីវិត ក្នុងហេតុការណ៍ធ្លាក់យន្តហោះ 737 MAX ក្នុងឆ្នាំ២០១៩ ដោយបញ្ចៀសការកាត់ក្តីរដ្ឋប្បវេណីរបស់សហព័ន្ធ។

ប្រភពចំនួន៣ ដែលបានដឹងអំពីករណីនេះ បានប្រាប់សារព័ត៌មាន AFP ថា ដំណោះស្រាយមួយ ត្រូវបានយល់ព្រមក្រៅតុលាការ ដោយពុំមានព័ត៌មានលម្អិតបន្ថែមទេ។

ការធ្លាក់យន្តហោះរបស់ក្រុមហ៊ុនអាកាសចរណ៍ Ethiopian Airlines បានបណ្តាលឲ្យមនុស្ស ១៥៧នាក់ ស្លាប់។ ការកាត់ក្តី ត្រូវបានកំណត់ថា នឹងចាប់ផ្តើម នៅថ្ងៃទី ១២ ខែវិច្ឆិកានេះ នាទីក្រុង Chicago។ ប្រភពដឹងអំពីករណីនេះ បាននិយាយថា ដំបូងឡើយ សំណុំរឿងនេះ មានដើមបណ្តឹង ចំនួន ៦នាក់ ប៉ុន្តែរហូតមកដល់ពេលនេះ មានតែម្នាក់ប៉ុណ្ណោះ ត្រូវបានដោះស្រាយ។

ប្រភពបានបន្តថា សវនាការនៅថ្ងៃទី ១២ ខែវិច្ឆិកានេះ នឹងប្រព្រឹត្តទៅ ដើម្បីជូនដំណឹងដល់លោកចៅក្រម Jorge Alonso អំពីដំណោះស្រាយដែលត្រូវតែអនុម័តកិច្ចព្រមព្រៀង ដើម្បីបញ្ចប់ជាផ្លូវការ។

ករណីដែលនៅសេសសល់ គឺពាក់ព័ន្ធនឹងវេជ្ជបណ្ឌិត Manisha Nukavarapu ស្ត្រីជនជាតិឥណ្ឌាម្នាក់ ដែលជិះលើយន្តហោះរបស់ក្រុមហ៊ុនអាកាសចេណ៍ Ethiopian Airlines ជើងហោះហើរលេខ ET302 កាលពីថ្ងៃទី១០ ខែមីនា ឆ្នាំ២០១៩ នៅពេលដែលយន្តហោះ Boeing 737 MAX 8 បានធ្លាក់ប៉ុន្មាននាទី បន្ទាប់ពីហោះចេញពីទីក្រុង Addis Ababa ដោយបានបណ្តាលឲ្យមនុស្ស ១៥៧នាក់ នៅក្នុងយន្តហោះនោះ ស្លាប់ទាំងអស់៕