​បាល់ទាត់៖ កីឡាករ​ក្រុម​ជម្រើសជាតិ​កម្ពុជា សារ៉េត គ្រី​យ៉ា បានជា​សះស្បើយ​ពី​ជំងឺ​កូ​វីដ​-១៩ ហើយបន្ទាប់ពី​ធ្វើតេស្ដ PCR ទទួលបាន​លទ្ធផល​អ​វិជ្ជមាន​មុនគេកាលពី​ម្សិលមិញ ខណៈ​អ្នកចាំទី កែវ សុខ​សិលា នឹងធ្វើ​តេស្ដ PCR ថ្ងៃនេះ។ រីឯ​កីឡាករ ៤​រូប​ទៀតរួមមាន ចាន់ វឌ្ឍនាកា​, សឿ​យ វិសាល​, អ៊ា​ន ពិសី និង គួច សុ​កុម្ភៈនឹងត្រូវ​ធ្វើ​ម៉ាស៊ីន​ធំ​ថ្ងៃស្អែកបន្ទាប់ពី​ធ្វើ​ច​ត្ដា​ឡី​ស័ក និង​ព្យាបាល​គ្រប់ ១០​ថ្ងៃតាម​គោលការណ៍​របស់​ក្រសួងសុខាភិបាល​បា​រ៉ែ​ន។​

​សមាជិក​ក្រុម​ព្រះខ័ន​រាជ​ស្វាយរៀង សារ៉េត គ្រី​យ៉ា បាន​ឲ្យ​ដឹងថា ខ្លួន​បានធ្វើ​តេស្ដ PCR មុនគេកាលពី​ថ្ងៃទី​១៨-​តុលា ព្រោះ​រូបគេបាន​រកឃើញ​វិជ្ជមាន​មុនគេ​ដូចគ្នា។ ក្រោយ​រង់ចាំ ១​ថ្ងៃទើប​ទទួលបាន​លទ្ធផល​អវិជ្ជមានកាលពី​ថ្ងៃ​អង្គារ​ម្សិលមិញ។ បន្ទាប់មក​ក្រុមគ្រូពេទ្យក៏​អនុញ្ញាត​ឲ្យ​ខ្សែការពារ​ដ៏​រឹងមាំ​រូបនេះចាក​ចេញពី​សណ្ឋាគារ​ស​ម្រាក​ព្យាបាល​នោះ វិល​ទៅ​សណ្ឋាគារ​ដែល​ក្រុម​ជម្រើសជាតិ​កម្ពុជា​ស្នាក់នៅ​វិញដើម្បី​រង់ចាំ​មិត្ត​រួម​ក្រុម ៥​នាក់​ផ្សេងទៀត។​ ​គ្រី​យ៉ា បន្ដថា ការពិត​បន្ទាប់ពី​សម្រាក​ព្យាបាល ១០​ថ្ងៃ ហើយ​ធ្វើតេស្ដ PCR អវិជ្ជមាន ឬ​លេង​មាន​ជំងឺ​កូ​វីដតាមច្បាប់​សុខាភិបាល​បា​រ៉ែ​ន ខ្លួន​អាច​ត្រឡប់មក​កម្ពុជា​វិញ​បានតែ​ក្នុងនាម​មិត្ត​រួម​ជាតិ និង​មានការ​ស្រុះស្រួល​មតិ​គ្នា​ផង ទោះបី​អ្នកណា​ជាមុន ឬ​ក្រោយ​ក៏ដោយក៏​ពួកគេ​ត្រូវ​រង់ចាំ​ជាសះស្បើយ​ទាំងអស់គ្នា ទើប​ធ្វើដំណើរ​ត្រឡប់មក​មាតុភូមិ​វិញ​រួមគ្នា។ ដូច្នេះ គ្រី​យ៉ា សម្រាក​នៅ​សណ្ឋាគារ​មួយទៀតដោយមាន​ការយកចិត្ត​ទុកដាក់​ខ្ពស់​ពី​ថ្នាក់ដឹកនាំ​សហព័ន្ធ និង​ក្រុម​ជម្រើសជាតិ​កម្ពុជា។​ ​ចំពោះ កែវ សុខ​សិលា ត្រូវធ្វើ​តេស្ដ PCR បន្ទាប់ពី គ្រី​យ៉ា នៅ​ថ្ងៃទី​២០ ខែតុលា​នេះ ព្រោះ​គេ​គឺជា​កីឡាករ​បន្ទាប់ដែល​រកឃើញ​វិជ្ជមាន ក្រោយ​រួមចំណែក​ជួយ​ក្រុម​គោព្រៃ​កម្ពុជាឈ្នះ​កោះ​ហ្គាំ ១-០ នៅ​ជើង​ទី​១ នៃ​វគ្គ​ជម្រុះ​ពានរង្វាន់ AFC Asian Cup China 2023។ រីឯ​កីឡាករ វឌ្ឍនាកា​, វិសាល​, ពិសី និង​សុ​កុម្ភៈ នឹងត្រូវ​ធ្វើតេស្ដ PCR នា​ថ្ងៃទី​២១ ខែតុលា​ស្អែក ព្រោះ​ពួកគេ​រកឃើញ​វិជ្ជមាន​ក្នុង​ថ្ងៃ​ជាមួយគ្នា។ ដូច្នេះ​ថ្ងៃនេះ និង​ថ្ងៃស្អែកគឺជា​គម្រប់ ១០​ថ្ងៃនៃ​ការធ្វើ​ច​ត្ដា​ឡី​ស័ក និង​ព្យាបាល​របស់​ពួកគេ។​

​តាម​ការបញ្ជាក់​របស់​ប្រធាន​ក្រុមរ សឿ​យ វិសាល អំឡុងពេល​សម្រាក​ព្យាបាល​នៅ​ទីនោះ ពួកគេ​ត្រូវបាន​យកចិត្តទុកដាក់​ពី​ក្រុមគ្រូពេទ្យ ពិសេស​ថ្នាក់ដឹកនាំ​សហព័ន្ធតាមរយៈ​ក្រុមការងារ​គ្រូ​ជម្រើសជាតិ ជាក់ស្ដែង​អ្នកចាត់ការ​ក្រុម​លោក ឈូក ពិសិដ្ឋ បាន​ទិញ​គ្រឿងឧបភោគ​បរិភោគ​មួយចំនួន​ទុក​ឲ្យ​ពួកគេមុន​ចាក​ចេញទៅ​ជប៉ុន។ មិនតែប៉ុណ្ណោះ ក្រុមការងារ​ជម្រើសជាតិក៏បាន​ទាក់ទង​ស្ដ្រី​ខ្មែរ​បម្រើ​ការងារ​នៅ​បា​រ៉ែ​ន​លោកស្រី ប៉ម សុភ័ក្ដ្រ ដើម្បី​បានធ្វើ​ម្ហូបអាហារ​ខ្មែរ និង​យក​ឲ្យ​ពួកគេ​រៀងរាល់ថ្ងៃ​ទៀតផង។​ ​សូមបញ្ជាក់ថា កីឡាករ​ជម្រើសជាតិ​កម្ពុជា​ទាំង ៦​រូប​ខាងលើបាន​រកឃើញ​វិជ្ជមាន​កូ​វីដ​-១៩ ក្នុងពេល​បំពេញបេសកកម្ម​នៅ​ប្រទេស​បា​រ៉ែ​នក្នុងការ​ប្រកួត​ជម្រុះ Play-Off នៃ​ពានរង្វាន់ AFC Asian Cup China 2023 ជាមួយ​ក្រុម​កោះ​ហ្គាំ ស្របពេល​ក្រុម​គោព្រៃ​កម្ពុជាបាន​យកឈ្នះ​ក្រុម​ដែន​កោះ​របស់​សហរដ្ឋអាមេរិក​នេះទាំង ២​ជើងក្នុង​លទ្ធផល ៣-១ ដើម្បី​ឡើងទៅ​វគ្គ​ជម្រុះ​ជុំ​ទី​៣ នៃ​ពានរង្វាន់​ជើងឯក​ទ្វីបអាស៊ី​នេះ​៕

អត្ថបទ៖ លី ឈុន​ឡា​