បន្ទាប់ពីបានជួបជាមួយសមភាគីអូស្ត្រាលី នៅទីក្រុងកង់បេរ៉ា រដ្ឋមន្ត្រីក្រសួងការពារជាតិហ្វីលីពីន លោក Gilberto Teodoro នៅថ្ងៃអង្គារ (ទី១២ ខែវិច្ឆិកា) នេះ បាននិយាយថា ប្រទេសចិនកំពុងដាក់សម្ពាធកាន់តែខ្លាំងឡើងៗលើហ្វីលីពីន ដើម្បីឲ្យបោះបង់សិទ្ធិអធិបតេយ្យភាពរបស់ខ្លួន នៅសមុទ្រចិនខាងត្បូង។

លោកបានប្រាប់ថា «អ្វីដែលយើងឃើញ គឺជាការទាមទារកាន់តែខ្លាំងឡើងៗពីសំណាក់ទីក្រុងប៉េកាំង ដើម្បីឲ្យយើងព្រមបោះបង់សិទ្ធិអធិបតេយ្យភាពរបស់យើង នៅក្នុងតំបន់» ដោយលោកបានបន្ថែមថា ហ្វីលីពីនគឺជា «ជនរងគ្រោះនៃការរុករានរបស់ចិន»។

គួរបញ្ជាក់ថា ប្រទេសចិន និងហ្វីលីពីន បានមានជម្លោះជាមួយគ្នាម្តងហើយម្តងទៀត នៅឆ្នាំនេះ ជុំវិញតំបន់ប្រទាញប្រទង់ នៅសមុទ្រចិនខាងត្បូង ក្នុងនោះរួមទាំងតំបន់ថ្មប៉ប្រះទឹក Scarborough Shoal ជាតំបន់ដែលមានភាពចម្រូងចម្រាសបំផុតមួយរបស់តំបន់អាស៊ី។

កិច្ចប្រជុំរបស់លោក Teodoro ជាមួយសមភាគីអូស្ត្រាលី លោក Richard Marles ដែលជាលើកទី៥ របស់រដ្ឋមន្ត្រីទាំង២ ចាប់តាំងពីខែសីហា ឆ្នាំ២០២៣ ឆ្លុះបញ្ចាំងពីការកើនឡើងនៃទំនាក់ទំនងសន្តិសុខ រវាងប្រទេសទាំង២ ដែលសុទ្ធតែបានបង្ហាញនូវក្ដីបារម្ភ អំពីសកម្មភាពរបស់ចិន នៅក្នុងតំបន់នៃសមុទ្រចិនខាងត្បូង ដែលទាមទារដោយហ្វីលីពីន និងប្រជាជាតិអាស៊ីអាគ្នេយ៍ផ្សេងទៀត។

ប្រទេសទាំង២ បានចុះហត្ថលេខាលើភាពជាដៃគូយុទ្ធសាស្ត្រ ក្នុងខែកញ្ញា ឆ្នាំ២០២៣ ហើយបានធ្វើការល្បាតរួមគ្នាលើកដំបូង នៅដែនទឹក និងអាកាស ក្នុងសមុទ្រចិនខាងត្បូងជាច្រើនខែក្រោយមក។ ហើយលើសពីនោះទៀត ហ្វីលីពីនក៏បានចូលរួមសមយុទ្ធជាលើកដំបូង នៅអូស្ត្រាលី ក្នុងឆ្នាំនេះដែរ៕